Kya Sach Mein Koi Kaam Hard Hota Hai?

Kya hard kaam sach mein hard hota hai? Mere hisaab se nahi.

Jo kaam aapko hard lag raha hai, ho sakta hai kisi aur ke liye wahi kaam bahut easy ho. To phir woh kaam hard kaise hua? Kuch logon ke liye hard aur kuch logon ke liye easy - phir us kaam ko hum hard kaise keh sakte hain? Agar sabhi ko woh kaam hard lagta, tab hum use hard bolte.

Yaad rakhna, koi bhi kaam ya koi bhi cheez jo tum seekh rahe ho, tumhe hard lag sakti hai, lekin asal mein woh hard nahi hoti. Bas tumhe hard lag rahi hoti hai.

Example :

Maan lo Mathematics subject aapko hard lagta hai, lekin kisi doosre student ko Mathematics solve karne mein maza aata hai aur woh kehta hai, "Math to bahut easy hai."

To batao, Mathematics hard hai kya?

Nahi.

Bas aapne use achhe se samjha nahi hai, isliye aapko woh hard lag raha hai. Ek baar aap Mathematics ko achhe se samajh jao, phir dekhna kitna maza aayega. Tab aap bhi bologe, "Ye to bahut easy hai!"

Ye to study-related example hua. Ab ek example lete hain jo study se related nahi hai.

Example :

Mujhe video editing karne mein maza aata hai, lekin kuch log kehte hain, "Ye bahut hard kaam hai. Itna time computer ke saamne kaise baithte ho? Ek hi song ko baar baar sunte raho, bore nahi ho jaoge? Kaise kar lete ho ye sab?"

Lekin mujhe ye sab karne mein maza aata hai. Kyun?

Kyunki mujhe video editing mein interest hai.

Jis cheez mein tumhara interest hoga, woh cheez tumhe easy hi lagegi. Lekin kisi doosre person ko wahi kaam hard lag sakta hai, kyunki woh us kaam ko karna nahi chahta ya usmein uska interest nahi hai. In dono examples se aap samajh gaye honge ki "hard" bolkar koi bhi cheez automatically hard nahi ho jaati. Bas woh cheez aapko hard lag rahi hoti hai. Isliye jab bhi tumhe koi kaam hard lage, samajh jaana ki ya to tumne us cheez ko achhe se samjha nahi hai, ya phir us cheez mein tumhara interest nahi hai.

Agar problem samajhne mein hai, to us cheez ki core tak jao, shuru se seekho aur fundamentals clear karo. Dheere dheere tumhe sab kuch samajh mein aane lagega. Jab tumhari ye problem solve ho jayegi, tab doosri problem - "interest nahi lag raha" - woh bhi dheere dheere solve ho jayegi. Kyunki jab tum kisi cheez ko samajhne lagte ho, to automatically usmein interest aana start ho jaata hai. Is tarah tumhe jo cheez hard lag rahi hai, use tum easy bana sakte ho.

Bachpan se teachers bolte aa rahe hain, "Fundamentals clear karo." Lekin hum kya karte hain?

Ek-do baar kisi cheez ko samajhne ki koshish karte hain. Jab samajh nahi aata, to hum soch lete hain, "Ye to mujhse hone wala hi nahi hai." Phir hum maan lete hain ki ye cheez hamare liye bani hi nahi hai aur haar maan lete hain.

Kabhi bhi haar mat maanna. Agar ek-do baar try karne ke baad bhi tumhe samajh nahi aa raha hai, to iska matlab ye nahi hai ki tum ye nahi kar sakte. Iska matlab sirf itna hai ki tumhe thodi aur koshish karni hai, thodi zyada mehnat karni hai aur thoda aur time dena hai. Ho sakta hai tumhe shuru mein thoda zyada effort karna pade, lekin ek din tum wahi cheez karne lagoge jo pehle tumhe impossible lag rahi thi. Aur dheere dheere tumhe sab kuch samajh mein aane lagega.

Phir ek din tum khud bologe: "Ye to itna easy tha, mujhe pehle hard kyun lag raha tha?"

Mere kahe hue in baaton ko sirf motivation ki tarah mat lena. In baaton ko apni zindagi mein apply karna. Jab bhi tumhe koi cheez hard lage, turant ye mat sochna ki "Ye mujhse nahi hoga." Pehle ye samajhne ki koshish karna ki problem kahan hai. Kya tumne us cheez ko achhe se samjha nahi hai? Ya tumhare fundamentals clear nahi hain? Ya phir tumhara usmein interest nahi hai?

Problem ko identify karo aur uski root tak jao. Agar fundamentals weak hain, to shuru se seekho. Agar samajhne mein problem hai, to aur time do. Aur agar interest nahi hai, to pehle us cheez ko samajhne ki koshish karo. Ho sakta hai jis cheez mein aaj tumhara interest nahi hai, kal wahi tumhari favourite cheez ban jaaye.

Meri life mein main ye kar chuka hoon. Jo cheez kabhi mujhe hard lagti thi, use main easy bana chuka hoon. To tum kyun nahi kar sakte?

Jab koi kaam easy lagne lagta hai na, tab usmein ek alag hi maza aata hai. Tum us kaam ko bina pressure ke karna chahte ho aur us process ko enjoy karte ho. Agar tum bhi usi feeling ko achieve karna chahte ho, agar tum bhi apna kaam enjoy karte hue karna chahte ho, to meri baat ko sirf motivation samajhkar mat chhod dena. Meri baat ko seriously lena aur apni zindagi mein apply karna. Ho sakta hai aaj jo cheez tumhe hard lag rahi hai, kuch time baad tum usi cheez ko dekhkar bolo: "Ye to bahut easy hai!"