Meri life mein jo bhi hota hai, usse mujhe kuch na kuch seekhne ko milta hai.
Train ya bus stand par jo log saari pehenkar paise maangte hain(transgender), aap samajh rahe honge main kin logon ki baat kar raha hoon. Main unke aashirvaad mein believe karta hoon, kyunki meri life mein kuch aisa hua hai jo mere liye iska example hai.
Jab bhi main ghar jaata hoon, bus stand par mujhe woh log mil jaate hain. Main hamesha unhe paise de deta hoon. Woh ₹10 mangte hain aur paise dene par aashirvaad bhi dete hain. Jab tak maine unhe bina kanjoosi ke paise diye hain, mujhe kabhi paison ki kami mehsoos nahi hui. Kahin na kahin se mere liye paisa aa hi jaata hai aur income ka koi na koi raasta apne aap khul jaata hai. Jaise agar YouTube se kamai nahi ho rahi hai, to part-time job ka offer aa jaata hai. Matlab, agar ek raasta band hota hai, to income ka doosra raasta apne aap khul jaata hai.
Ek baar to aisa hua ki mere paas sirf ghar jaane ke liye hi paise the. Usmein se maine teen logon ko ₹10, ₹10 karke ₹30 de diye. Mujhe pata tha ki mere paas sirf ghar jaane bhar ke paise hain aur agar main unhe paise de dunga, to mere bus ka bhada kam pad jaayega. Phir bhi maine unhe paise de diye. Mujhe Bhubaneswar se Baripada jaana tha aur uske baad Baripada se apne ghar. Baripada tak ka bus ka bhada mere paas tha, lekin Baripada se ghar jaane ke liye ₹30 kam pad rahe the. Mere gaon ki taraf bus conductor online payment accept nahi karte the, cash hi dena padta hai.
Mere paas online mein bhi sirf ₹70 the. Mere paas ATM card bhi nahi tha, warna main ATM se paise withdraw kar leta. Agar kisi CSC centre se paise nikalne hote, to minimum ₹100 hona zaroori tha, lekin mere paas sirf ₹70 hi the. Mujhe ye bhi nahi pata tha ki Baripada pahunchne ke baad mujhe koi CSC centre milega ya nahi. Phir bhi maine Bhubaneswar se Baripada tak ka safar shuru kar diya. Raaste mein maine ek dost ko call karke paise maange aur usne mujhe online paise bhej diye. Luckily, Baripada Bus Stand par hi mujhe ek CSC centre mil gaya. Maine wahan online payment karke cash nikaal liya, phir bus pakadkar apne ghar pahunch gaya.
Aisi situation mein bhi maine un logon ko paise diye the, jab mujhe khud pata tha ki mere paas ghar pahunchne ke liye paise kam pad sakte hain. Ek time aisa bhi aaya jab main thoda kanjoosi karne laga. Main paise hote hue bhi unhe paise dena nahi chahta tha. Mere dimaag mein ye chalta tha ki agar main paise de dunga aur baad mein mujhe zarurat pad gayi, to main khud phans jaaunga.
Us ke baad dheere dheere mere paise kamane ke saare raaste jaise band hone lage aur mujhe paison ki kami mehsoos hone lagi. Tab mujhe laga ki maine galti ki hai. Uske baad jab maine phir se bina soche unki madad karna shuru kiya, to mujhe dobara earning ke naye raaste milne lage. Mere liye ye ek bahut bada experience tha.
Isse mujhe ye samajh aaya ki jab hum kisi ki madad karte hain, to God bhi kisi na kisi tarah hamari madad karte hain. Kabhi kabhi shayad woh hamari pariksha bhi lete hain - ye dekhne ke liye ki jab hum khud problem mein hote hain, tab bhi kya hum kisi ki madad karte hain ya nahi. Jaise mere saath ghar jaate waqt hua tha. Isliye agar aap kisi ki help kar sakte ho, to dil se help karo. Sirf ye mat socho ki agar maine paise de diye to mere paise kam ho jaayenge. Jis tarah aapne kisi ki help ki hai, ho sakta hai kal koi doosra insaan aapki help karne ke liye khada ho.
Yaad rakho, agar aap kisi ko ₹10 de rahe ho, to zaroori nahi ki uske badle aapko sirf ₹10 hi mile. Ho sakta hai aap kisi aur tareeke se usse kai guna zyada kama lo. Aur agar aap sirf kanjoosi karke paise bachane ke baare mein sochoge, to ho sakta hai ₹10 bachane ke chakkar mein aapka ₹1,000 ka loss ho jaaye aur aapko pata bhi na chale. Maine yahan sirf example ke liye ₹10 aur ₹1,000 kaha hai. Amount aapki situation ke according alag ho sakta hai.
Meri life se mujhe ek aur important baat samajh aayi hai - apni life mein jo bhi ho raha hai, use observe karo. Aapko bahut kuch seekhne ko milega. Hum jo bhi books mein padhte hain, unmein likhi baatein sirf baatein nahi hoti. Unka example humein apni khud ki life mein bhi mil sakta hai. Bas zarurat hai un cheezon ko observe karne ki.
Aap observe nahi karte, isliye aapko pata nahi chalta ki aapki life aapko har din kya sikha rahi hai. Aage se apni life ko thoda dhyaan se observe karna. Dekhna, aapko khud samajh aayega ki life aapko kitna kuch sikha rahi hai.
Bus stand, mandir, railway station ya kahin bhi agar aapko aise divyang log milen jo kaam karne mein saksham nahi hain, to jitna ho sake unki madad karein. Aur transgender community ke logon ko bhi apni ichha aur samarthya ke anusaar madad karein.
0 Comments