Hamare college me ek chor tha, jo hamare class ka hi tha. Pehle to maine bachchon ke muh se hi suna tha ki woh ladka chori karta hai, lekin ek din maine apni aankhon se bhi dekh liya.
Ek din humne hostel me chicken curry banayi thi. Us din khana khane ke baad main apni thali dhone ke liye bathroom gaya. Wahan woh ladka pehle se hi apni thali dho raha tha. Maine bhi apni thali wahan rakh di aur detergent lene ke liye room chala gaya. Jab main detergent lekar bathroom wapas aaya, to dekha meri thali wahan nahi thi aur woh ladka bhi gayab tha. Main samajh gaya ki thali wahi lekar gaya hai, kyunki bathroom me hum dono ke alawa koi aur nahi tha.
Main seedha uske paas gaya aur pucha, "Meri thali tune li hai?"
Usne kaha, "Haan, mujhe laga tu nahi lega, isliye main le aaya."
Maine kaha, "Main sirf detergent lene ke liye room gaya tha. Itne me hi tune meri thali le li?"
Maine usse aur kuch nahi kaha. Bas apni thali maangi aur wapas aa gaya. Us din mujhe samajh aa gaya ki woh sach me chori karta hai. Usne bahut saare bachchon ke paise, smartphone, earphone aur kai saari cheezen churayi thi.
Phir ek din hamare semester exam ki date aa gayi. Woh ladka hostel me nahi rehta tha. Us samay hum 5th year me the. Woh semester exam dene ke liye college aaya tha aur exam khatam hone tak hostel me hi rehne wala tha. Dusre rooms me bed khali nahi tha, isliye woh hamare room me rehne aa gaya. Hum sabhi jaante the ki woh chori karta hai. Isliye hum hamesha dhyan rakhte the ki room me koi na koi zaroor rahe, taki use chori karne ka mauka na mile.
Ek din shaam ko woh market chala gaya. Dinner ka time ho gaya, lekin woh wapas nahi aaya. Hume bhi khane ke liye canteen jana tha aur sabko bahut bhook lagi thi. Jo bachche pehle khane ke liye gaye the, woh abhi tak wapas nahi aaye the. Isliye humne decide kiya ki room ko lock karke canteen chale jaate hain. Humne room par tala lagaya aur sabhi canteen chale gaye. Jab hum khana kha rahe the, tab woh ladka hume call kar raha tha, lekin hum jaan bujhkar uska call nahi utha rahe the. Main aur mera ek dost jaldi jaldi khana khatam karke room ki taraf wapas aa rahe the. Raste me ek dost mila. Usne kaha, "Jaldi jao, tumhare room me woh chor ladka akela baitha hai."
Hum dono chonk gaye. Humne kaha, "Tu jhooth bol raha hai. Hum to room lock karke aaye hain, woh andar kaise ghus sakta hai?"
Usne kaha, "Nahi, sach bol raha hoon. Yakeen nahi ho raha to jaakar dekh lo."
Phir hum dono jaldi jaldi room ki taraf chalne lage. Maine apne dost se kaha, "Agar woh sach me tala todkar room me ghusa hai, to aaj main use room se bahar kar dunga. Main use yahan rehne nahi dunga." Mera dost bola, "Tu hi usse bol sakta hai, kyunki hum pehle dost the. Tera uske saath koi relation nahi hai. Tu bolna, main chup rahunga." Maine kaha, "Theek hai."
Jab hum room pahunche, to dekha ki sach me woh room ke andar baitha tha aur biryani kha raha tha.
Mujhe bahut gussa aa gaya. Maine usse kaha, "Room to lock tha, tu andar kaise ghusa?"
Usne kaha, "Tala khul gaya."
Maine kaha, "Hum sab room me nahi the aur bahar se tala laga hua tha. Tu andar kaise ghus gaya?"
Usne kaha, "Maine tum logon ko call kiya tha, lekin tumne uthaya nahi. Phir maine tala haath se hilaya aur woh khul gaya."
Maine gusse me kaha, "Hum call nahi utha rahe the, to iska matlab yeh hai ki tu tala todkar andar ghus jayega?"
Woh bola, "Maine tala nahi toda. Tala achhe se laga nahi tha, isliye khul gaya aur main andar aa gaya."
Maine usse saaf keh diya, "Tu khana kha aur hamare room se nikal ja. Hum tujhe yahan rehne nahi denge. Tere jaise ladke ke liye hamare room me koi jagah nahi hai." Woh chupchaap meri baat sun raha tha. Main thodi der ke liye chhat par chala gaya. Jab wapas aaya, to dekha woh khana kha chuka tha aur room me hi baitha hua tha. Maine usse kaha, "Khana kha liya? Ab room se nikal." Lekin woh argument karne laga. Dusre bachchon ne bhi usse room se jaane ke liye kaha, lekin woh chupchaap sunta raha aur wahin baitha raha.
Kuch der baad woh room se bahar chala gaya. Maine apne roommate se kaha, "Door andar se laga do aur light off kar do. Sabhi sone ka acting karo. Agar woh call kare, to koi bhi call mat uthana." Humne yeh step lene ka faisla isliye kiya, kyunki itna kehne ke baad bhi woh hamari baat nahi sun raha tha. Hamare room me 3-4 laptop the, bahut saare mobile the aur sabke paas cash bhi tha. Hume darr tha ki agar use mauka mil gaya, to kisi ka bhi saman chori ho sakta tha.
Woh bahar aaya aur hume awaaz lagane laga, lekin humne koi response nahi diya. Usne sabko lagatar call kiya, lekin kisi ne call nahi uthaya. Aakhir me usne mujhe call kiya aur kaha, "Door kholo. Main abhi raat ko kahan jaunga? Kal mera exam hai. Aaj raat mujhe yahin rehne do, kal exam dekar chala jaunga." Maine saaf saaf keh diya, "Door nahi khulega. Tu kahan jayega aur kahan rahega, yeh mujhe nahi pata. Main tujhe keh chuka hoon ki yahan se chala ja. Matlab chala ja. Hum tujhe yahan rehne nahi denge." Itna kehkar maine call kaat diya. Uske baad woh baar baar call karta raha, lekin maine uska call nahi uthaya.
Kuch der baad mere roommate ko bahut zor se peshab lagi. Hamara toilet room ke bahar tha, isliye woh toilet jaane ke liye door kholne laga. Maine use roka aur kaha, "Abhi bahar mat ja. Woh chor ladka bahar hi hoga. Jaise hi door khulega, woh andar ghus jayega." Woh bola, "Lekin mujhe bahut serious peshab lagi hai. Main aur nahi rok sakta." Phir usne kaha, "Theek hai, ek kaam karta hoon. Window se hi peshab kar deta hoon." Woh window ke paas khada hua aur wahin se peshab kar diya. Hum sab yeh dekhkar hasne lage.
Pata nahi woh ladka us raat kahan soya. Agle din woh aaya aur apna saman lekar chala gaya. Lekin uske kuch din baad main us din ke baare me soch raha tha. Mujhe us din bahut zyada gussa aa gaya tha. Usne mujhse request bhi ki thi ki kam se kam us raat use sone diya jaye, kyunki agle din uska exam tha. Lekin maine uski ek bhi baat nahi suni. Mujhe us par thoda sa bhi daya nahi aayi ki woh raat ko kahan jayega aur kahan rahega. Uska sara saman bhi hamare room me tha. Woh baar baar keh raha tha, "Mera saman de do, main lekar chala jaunga." Lekin maine saaf keh diya, "Aaj door nahi khulega. Door khola to tu phir andar aa jayega. Kal aakar apna saman le jana."
Us din bachche mera yeh roop dekhkar bhi chonk gaye the. Woh mujhse kehne lage, "Tu to kabhi kisi ko kuch nahi kehta aur na hi kabhi kisi se ladta hai. Tere andar itna saara gussa kahan se aa gaya?"
Sach kahun to us din mujhe khud bhi samajh nahi aa raha tha ki mujhe itna gussa kyun aa gaya tha. Shayad baar baar uski chori ki baatein sunna, apni aankhon se uska meri thali le jana dekhna aur phir locked room me uska achanak andar milna - yeh sab dekhkar mera saara gussa ek saath bahar aa gaya tha.
0 Comments