Yeh baat uss waqt ki hai jab main KISS, Bhubaneswar me 10th class me padhta tha. Us din Parents' Meet tha. Mere bade bhai mujhse milne aaye the aur jaate waqt unhone mujhe ₹700 diye. Maine woh paise ek dress ke pocket me rakh diye aur us dress ko apne bag ke andar rakhkar lock kar diya.
Us din humein, yani 10th class ke sabhi students ko, Parents' Meet ke dauran aaye hue parents ko khana serve karne ke liye bheja gaya. Hum sab apna kaam karne chale gaye. Jab main wapas hostel ke room me aaya, to dekha ki mere bag ka lock tuta hua tha. Sirf lock hi nahi, balki woh dress bhi gayab thi jisme maine ₹700 chhupakar rakhe the.
Maine turant apne doston ko is baat ke baare me bataya. Hum sabko shak ek ladke par hua, kyunki us din woh khana serve karne nahi gaya tha aur room me wahi akela ruk gaya tha. Sabko laga ki paise usi ne churaye honge. Mere doston ne us ladke ko pakad liya aur gusse me aakar use bahut maara. Lekin itni pitai ke baad bhi usne ek baar bhi yeh nahi maana ki usne chori ki hai.
Us waqt mujhe uske liye bura laga. Sirf shak ke aadhar par kisi ko itna maarna mujhe sahi nahi laga. Maine socha, agar isne sach me chori ki hoti to shayad itni pitai ke baad maan leta. Isliye maine apne doston se kaha ki use chhod do. Jo hona tha, woh ho chuka tha.
Is ghatna ke lagbhag 4–5 mahine beet gaye. Main bhi us ₹700 ke baare me lagbhag bhool chuka tha. Ek din hostel me main so raha tha. Jab meri aankh khuli, tab maine dekha ki wahi ladka apne doston ke saath baitha hua tha. Shayad use laga ki main abhi bhi so raha hoon. Tabhi maine use apne doston ko yeh kehte hue suna ki us din mere ₹700 usi ne churaye the. Woh poori ghatna sach-sach bata raha tha. Uski baat sunkar mujhe ek pal ke liye hairani hui, lekin us waqt tak 4–5 mahine beet chuke the. Main us paise ko kab ka bhool chuka tha. Isliye maine usse kuch nahi kaha aur na hi kisi ko bataya.
Us din mujhe ek baat samajh aayi ki sach ko chahe kitna bhi chhupa lo, ek na ek din woh khud saamne aa hi jaata hai.
0 Comments