4th Mulakat :
Date thi 23 April 2026, Thursday. Main meri best friend ke boyfriend ke paas chala gaya tha. Tum mujhse naraz the, kyunki main farewell mein nahi tha. College mein humein farewell diya ja raha tha, lekin maine attend nahi kiya. Farewell ke ek din pehle hi main college se nikal aaya tha aur tumhe bina bataye chala gaya tha.
Maine pehle kaha tha, “Chalo, shopping ke liye jaate hain. Mujhe farewell ke liye dress kharidni hai.” Tum nahi gaye. Maine kaha tha, “Agar tum nahi jaoge to main gayab ho jaunga. Tum mujhe dhoondhte reh jaoge.” Aur maine aisa hi kiya. Main bina bataye gayab ho gaya.
Tumne raat ko kaha, “Main kal tumhare paas aa raha hoon. Tum kahan rehte ho, batao.” Maine kaha, “Tum Baramunda tak aa jao, main bhi aa jaunga. Wahi mil lenge.” Tum Baramunda Bus Stand aaye aur main bhi kuch der baad wahan pahunch gaya.
Tum sirf sawaal kiye ja rahe the—“Tumne aisa kyun kiya? Tum aaye kyun nahi? Aur tum bina bataye kyun chale aaye?” Tum dukhi the aur sawaal hi sawaal kiye ja rahe the. Main chup tha. Aur karta bhi kya? Galti to kar chuka tha. Mujhe laga tha ki agar main tumhe batata to tum mujhe mana hi lete ki farewell attend karun. Isliye main bina bataye aa gaya tha. Aaj bhi main tumse uske liye sorry bolta hoon. Agar tum ye padh rahe ho, to please mujhe us din ke liye maaf kar dena.
Phir hum bus stand se market gaye aur mere liye dress kharidi. Tumne mujhe do shirts lene ke liye kaha. Maine mana kiya, lekin tum zid kar rahe the, isliye humne dono shirts le li. Humne saath mein time spend kiya. Bhookh lag rahi thi, to humne lemon water piya aur uske baad pet bhara hua mehsoos hone laga. Phir tum khane ke liye hotel se parcel lekar hostel chale gaye. Tum bahar khana nahi khate the.
Uske baad main shaam ko hostel gaya, kyunki mera bag meri best friend ke boyfriend ke paas tha. Warna main bhi tumhare saath hostel chala jata. Main wahan se bag lekar train se Bhubaneswar Station gaya, phir Khurda aur wahan se college. Ye thi hamari chauthi mulakat.
5th Mulakat :
Date thi 16 May 2026, Saturday. Ye hamari paanchvi mulakat thi.
Us din public holiday tha. Hamara plan tha ki hum museum jayenge—tum, main aur tumhari didi. Lekin jab hum museum pahunche, to pata chala ki public holiday ki wajah se museum band tha. Phir hum tino ne wahan cold drink aur Lays khaye aur kuch der baithne ke baad Lingaraj Temple chale gaye.
Temple ke andar khali pair jana hota hai, isliye humne shoes utaar diye aur chalne lage. Dhoop ki wajah se zameen bahut garam thi. Aisa lag raha tha jaise hum agni pariksha de rahe hon. Mandir ka raasta itna garam ho rakha tha ki hum jaise-taise daudkar mandir pahunche. Wahan humne mobile aur bag deposit kar diye, kyunki andar mobile aur bag le jana allowed nahi tha.
Hum tino andar gaye the aur bhog ki thaili bhi lekar gaye the. Lekin wahan koi bhi pandit bina paise ke puja nahi kar raha tha. Hamare paas cash nahi tha. Online payment kar sakte the, lekin mobile to bahar deposit kar diya tha. Sabhi panditon ne puja karne se mana kar diya aur kaha ki ₹100 dena hoga, tabhi puja karenge. Isliye maine khud hi wahan puja ki aur bahar aa gaya. Wahan hum kuch der aam ke ped ke neeche baithe. Phir hum bahar aaye. Bahar humne shorts videos banaye - tum dono ki, tum aur tumhari didi ki. Humne selfies aur pictures bhi li.
Uske baad hum wapas laut rahe the. Raste mein ganne ka juice dikha, to humne wahan ganne ka ras piya. Uske baad khana khane ke liye restaurant chale gaye. Restaurant ka rasta usi ganne wale ne humein bataya tha. Restaurant mein hum dono ne ek hi plate mein khana khaya aur tumhari didi hamare saamne wali seat par baithkar khana kha rahi thi. Wahan tumne meri complaint apni didi se kar di thi. Maine tumhe daanta tha, kyunki tum mujhe mana kar rahe the ki main ghar na jaun.
Maine ghar jaane ke liye bus ticket kar liya tha, kyunki hamara exam khatam ho gaya tha aur hum pass out ho chuke the. Tumhari padhai abhi ek saal aur baaki thi. Ghar se papa bhi roz call kar rahe the aur pooch rahe the ki main kab aaunga. Tum zid kar rahe the ki main ghar na jaun. Isi wajah se maine tumhe thoda daant diya tha. Baad mein maine ticket cancel kar diya aur us din ruk gaya. Main ghar nahi gaya. Lekin tumhe jo daant padi thi, uski complaint tumne apni didi se kar di.
Wahan se khana khane ke baad hum ISKCON Temple chale gaye, lekin wahan pahunchne par gate close ho chuka tha. Hum kuch der wahan baithe. Tum aur tumhari didi ki shorts video maine apne iPhone se shoot ki aur pictures bhi li. Uske baad hum hostel wapas aa gaye.
Raat ko tum mujhe bataye ki tumhari behen ko main achha laga. Aur tumhari didi ne tumse kaha ki tum dono breakup kabhi mat karna, doosre lovers ki tarah. Tumhari didi ko main achha laga, ye sunkar mujhe bhi bahut achha laga.
6th Mulakat :
Date thi 25 May 2026, Monday. Ye hamari chhathi mulakat thi aur college life ki hamari aakhri mulakat bhi, kyunki meri padhai khatam ho chuki thi aur tumhari padhai abhi ek saal baaki thi.
Generally main bus se ghar jata hoon, lekin kyunki ye hamari aakhri mulakat thi, isliye hum dono train se ghar gaye. Maine hum dono ke liye online reservation kar diya tha. Lekin train mein hamari seats alag alag thi. Ek seat aane jaane ke raste ke left side mein thi aur doosri right side mein. Beech mein aane jaane ka rasta tha.
Phir maine paas wali seat par baithe ek person ko hamari seat par baitha diya aur hum dono paas paas baith gaye. Humne selfies li, baatein ki aur saath mein time spend kiya. Train ki journey 5–6 ghante ki thi, lekin pata hi nahi chala ki time itni jaldi kaise beet gaya.
Us din mere liye bahut khaas tha. Pata nahi phir kab aisa mauka milega ya nahi. Us din meri tin ichchha poori ho gayi thi. Pata hai, woh tino ichchhaen kya thi?
0 Comments