2 August 2026, Sunday ko hamari 7th mulakat hui. Main exam dene ke liye Bhubaneswar gaya tha. College khatam hone ke baad ye hamari pehli mulakat thi. Tum hostel mein the.
Mera exam khatam hone ke baad main seedha bus stand chala gaya, aur tum pehle se hi wahan mera intezar kar rahe the. Wahan ek dukaan se Lays aur popcorn kharidne ke baad humne thodi der saath mein waqt bitaya. Uske baad hum ISKCON Temple chale gaye.
Jab hum bus mein baithe the, ek ladka tumhe dekhe ja raha tha. Bus stand par bhi ek 45–50 saal ka aadmi tumhe dekh raha tha. Main ye sab notice kar raha tha. Aur dekhenge kyun nahi? Tum ho hi itne khoobsurat.
Temple pahunchkar dekha ki mandir khula hua tha. Tum bahut khush ho gaye. Lekin jaise hi hum darwaze ke paas pahunche, mandir ka darwaza band kar diya gaya. Tumhari khushi kuch hi palon ki thi. Pata nahi, shayad Bhagwan bhi nahi chahte the ki us din hamari mulakat mandir ke andar jaakar poori ho. Phir hum wahan se ek shopping mall chale gaye. Maine kaha, “Mujhe apne paison se kapde kharid do,” kyunki tumne part-time work karke ghar baithe lagbhag ₹3,000 kamaye the.
Tum mere liye dress choose kar rahe the, lekin phir maine tumhe mana kar diya. Maine socha ki tumhe baad mein kabhi bhi us paise ki zarurat pad sakti hai. Abhi bina zarurat ke paise kharch ho jayenge, aur mujhe bhi kapde kharidne ki koi zarurat nahi thi. Isliye maine tumhe mana kar diya. Lekin us din tum thode dukhi ho gaye the. Phir hum wahan se bus stand laut aaye. Bus stand ke bahar maine apne iPhone se tumhari short video shoot ki. Uske baad hum bus stand ke andar chale gaye. Maine tumhe jhal-chana diya, jo main ghar se tumhare liye bana kar le gaya tha.
Uske baad main tumhare chhote bhai se mila. Hum tino ne saath mein selfie li aur ice cream bhi khayi. Phir tum dono wapas hostel chale gaye, aur main bus stand par hi reh gaya, kyunki meri bus raat ko ghar wapas jaane wali thi. Jab bhi main tumhare saath hota hoon, lagta hai jaise waqt bahut hi tez chalne lagta hai. Sochta hoon ki is baar tumhare saath achhe se time spend karunga, lekin kabhi bhi dil ko poori tasalli nahi milti. Pata hi nahi chalta aur waqt bahut jaldi khatam ho jata hai.
Kitna achha hota na, agar us film ki tarah hamare paas bhi ek time machine hoti, jisme ghadi ko ghuma kar waqt ko peeche le ja sakte. Kaash hum bhi aisa kar pate…Waqt ko peeche le ja sakte, to kitna achha hota.
0 Comments