Ek din hamare college mein ek bahut hi khatarnak incident hua. Us din Sunday tha. Hamare college mein har Sunday ko outing hoti thi, jisme students shopping karne ya kisi bhi zaroori kaam ke liye bahar ja sakte the. Us din ek junior ladka college se bahar gaya tha aur wapas aate waqt usne drink kar rakhi thi. Raat ka time tha aur dinner ka waqt ho raha tha. Saare students khana khane ke liye canteen ki taraf ja rahe the. Wahi ladka nashe ki haalat mein apne ek dost se bad language mein baat kar raha tha. Uski awaaz aas-paas ke sabhi students sun rahe the.
Tabhi ek ladka wahan se guzra. Woh apne family members ke saath phone par baat kar raha tha. Usne drink kiye hue ladke se kaha, "Bhai, bad language mein mat bolo. Main apne gharwalon se baat kar raha hoon." Lekin jo ladka drink karke aaya tha, woh nashe mein tha. Use samajh hi nahi aa raha tha ki woh kya kar raha hai aur kis se baat kar raha hai. Isi baat ko lekar dono ke beech jhagda shuru ho gaya. Jis ladke ne drink ki thi, woh junior tha, jabki phone par family se baat karne wala ladka senior tha. Junior ladka senior ki baat maan nahi raha tha. Baat badhne lagi aur kuch aur senior students bhi wahan aa gaye.
Situation ko control karne ke liye hostel superintendent ko bulaya gaya. Superintendent sir aaye aur unhone poocha ki matter kya hai. Jab unhe poori baat samjhayi gayi, to unhone us junior ladke ko samjhane ki koshish ki. Lekin nashe mein dhut us ladke ne superintendent sir se hi badtameezi kar di. Usne sir se kaha, "Tu kaun hai be?" aur unhe dhakka bhi de diya. Nashe mein woh itna kho chuka tha ki use samajh hi nahi aa raha tha ki woh kisse kya keh raha hai aur kya kar raha hai.
Yeh dekhkar senior students aur bhi gussa ho gaye. Unka kehna tha ki, "Junior ho, theek hai, lekin tumne sir ko dhakka kaise de diya?" Gusse mein kuch senior students ne us junior ladke ko maar diya. Uske saath kuch aur junior students bhi the. Unhone poori baat apne hostel mein jaakar batayi ki senior students ne unke ladke ko maara hai. Hostel mein maujood kuch junior students ne bhi bina poori situation samjhe gusse mein react kiya. Woh senior students ke hostel ke neeche jaakar unhe bulane lage.
"Neeche aao! Kisne haath uthaya? Senior ho to kya kisi par haath uthaoge?"
Dheere-dheere do students ke beech shuru hua ek chhota sa jhagda junior aur senior students ke beech ka bada conflict ban gaya. Us din junior aur senior students ke beech bahut bhayanak maar-peet hui. Kuch students injured ho gaye. Kisi ne road se ek ladke ke pet mein ghunsa maar diya, aur kuch students ek-doosre par eent-patthar tak phenk rahe the. Puri situation dekhkar lag raha tha ki kisi bhi waqt kuch bhi ho sakta hai.
Is poori ladai mein B.Tech ke bahut saare students shamil the. Hamare management ke students ismein shamil nahi the. Hum sirf apne hostel ki chhat par khade hokar poora scene dekh rahe the, kyunki hamare hostel mein us waqt tala laga hua tha. Ladai rukne ka naam hi nahi le rahi thi. Tabhi college ke director sir wahan aaye. Unke haath mein ek rod thi. Woh chupke se piche ki taraf se aaye aur kuch students ko rod se maarna shuru kar diya. Sir ko dekhte hi students idhar-udhar bhaagne lage aur dheere-dheere wahan se sab log chale gaye.
Lekin sirf director ke aa jaane se problem poori tarah solve nahi hui. Kyunki ab yeh sirf do students ke beech ka jhagda nahi raha tha, balki junior aur senior students ke beech ka matter ban chuka tha.
Mahaul ko shaant karne ke liye college management ne sabhi senior students ko kuch din ke liye suspend kar diya. Sach kahun to mujhe yeh decision thoda ajeeb laga, kyunki meri nazar mein jhagda shuru karne ki galti junior ladke ki thi. Phir bhi senior students ko suspend kyun kiya gaya, yeh mujhe samajh nahi aaya. Khair, woh college management ka decision tha. Jo students injured hue the, unhe college ke hi hospital mein admit karaya gaya.
Jis ladke ki wajah se itna bada scene create hua tha, use raat bhar ek room mein rakha gaya. Jab tak uska nasha nahi utar gaya, tab tak use kuch bhi yaad nahi tha. Subah jab uska nasha poori tarah utar gaya, tab use raat ki ghatnaon ke baare mein bataya gaya. Us samay woh aise behave kar raha tha jaise raat ko kuch hua hi nahi ho. Baad mein us ladke ki bhi achhi-khaasi class li gayi.
Maine apni zindagi mein pehli baar apni aankhon ke saamne college mein itna bada aur bhayanak conflict dekha tha. Ek chhoti si baat se shuru hua jhagda dekhte hi dekhte junior aur senior students ke beech ki ladai mein badal gaya.
Aaj bhi jab main us din ko yaad karta hoon, to sochta hoon ki agar shuru mein hi dono students ko shaant kar diya gaya hota, to shayad baat itni door tak nahi pahunchti. Yeh hamare college ki un ghatnaon mein se ek thi, jise main shayad kabhi nahi bhool paunga.
0 Comments