Main College late join kiya tha dusre ladke ke comparison mein. Aisa isliye hua tha ki mujhe next batch ke liye admission kiya gaya tha, par ek bachcha current batch se college chhod diya, to wahan ek seat vacant ho gayi. Isiliye mujhe bulaya gaya. Us time sabhi bachche aa chuke the aur class bhi start ho chuki thi. Main jab class attend kiya, mujhe kuch samajh mein nahi aa raha tha. Phir main hostel mein jaakar YouTube par woh topic search karke dekhta tha aur samajh jaata tha.
Aise hi main class jaata tha, lekin kuch samajh mein nahi aata tha. Ek sir the jo ki kuch padhai hi nahi karte the, sirf WhatsApp par notes bhej dete the. Main us time YouTube par kaam kar raha tha aur earning bhi shuru ho gayi thi. Maine dekha ki class mein jaakar to kuch samajh mein nahi aa raha hai, room mein hi YouTube par video dekhkar samajhna padta hai. Class mein sirf time waste ho raha hai.
Time ki importance main pehle hi samajh gaya tha, jab se YouTube par kaam kiya hai. Us time ko agar main YouTube mein kaam karunga to paisa kamaunga. Aur waise bhi main YouTube se hi study kar raha hoon. Isliye maine decide kiya ki class nahi jaunga. Beech-beech mein kabhi-kabhi jaata tha, dekhne ke liye ki kaise chal raha hai. Main room mein roz ek bachche se poochta tha ki aaj kya padhai hua. Phir main raat ko woh YouTube se padhta tha aur notes bhi karta tha.
Ek din hamare HOD attendance dekh rahi thi. Unhone poocha, “Ye bachcha kahan hai?” Class mein poocha gaya to bachchon ne kaha, “Ye nahi aata hai. Kabhi-kabhi aata hai, jab man hua.”
Ma'am bahut gussa hui. Unhone poocha, “Kaun hai woh ladka? Uska dost kaun hai?” Bachchon ne kaha, “Woh kisi ke saath bhi zyada dosti nahi karta hai. Uska koi dost nahi hai.”
Ma'am bahut gussa ho gayi aur boli, “Kaun hai ye ladka? Class bhi nahi aa raha hai, dost bhi nahi hai. Room mein kya kar raha hai? Call karo use aur bulao.”
Bachchon ne mujhe call kiya, lekin mujhe pata tha ki class time mein call kar rahe hain. Matlab mujhe class mein dhoondh rahe hain, kyunki main class nahi gaya tha. Isiliye maine call uthaya hi nahi.
Ma'am ne bachchon se kaha, “Jao, use pakadkar lao.”
Lekin main room mein nahi tha. Main dusre room mein chala gaya tha, isliye mujhe dhoondh nahi paaye. Phir agle din bhi main class nahi gaya. Agle din bhi Ma'am ne bachchon se kaha ki use call karke bulao, lekin maine phone nahi uthaya.
Phir Ma'am ne kaha, “Number do uska.”
Phir Ma'am ne mujhe call kiya. Maine unknown number dekha, lekin main samajh gaya tha ki class se hi call aa raha hai. Isliye maine Ma'am ki bhi call nahi uthayi. Ma'am bahut zyada gussa ho gayi aur bachchon se kaha, “Tum jaakar pakadkar lao use. Kaun hai woh bachcha? Main dekhna chahti hoon. Uski himmat to dekho.” Main samajh gaya ki itna call aa raha hai, matlab mujhe dhoondhne aayenge. Isliye main dusre room mein chala gaya. Us din bhi mujhe dhoondh nahi paaye.
Ma'am ne kaha, “Kal subah us bachche ko ghaseetkar lekar aana. Hostel mein kahin par bhi ho, use lekar aana.”
Mujhe lunch ke time bachchon ne kaha, “Ye sab tujhe call kar rahe the. Tu phone kyun nahi uthaya? Ma'am bahut gusse mein hain. Tu jaakar mil le aaj.”
Maine kaha, “Aaj nahi jaunga, kal subah jaunga.”
Phir agle din main khud Ma'am ke chamber mein haazir ho gaya. Us din Ma'am achhe mood mein thi. Unhone achhe se poocha, “Tum class kyun nahi aa rahe ho, beta?”
Maine kaha, “Mujhe kuch samajh hi nahi aa raha hai class mein.”
Ma'am boli, “Poochna chahiye na. Samajh mein nahi aa raha hai to aise class band karna sahi hai kya?”
Maine kaha, “Nahi Ma'am.”
Ma'am ne poocha, “Achha, tum karte kya ho room mein din bhar? Kuch to kar rahe hoge. Padhai to nahi karte hoge. Karte kya ho din bhar?”
Maine kaha, “YouTube karta hoon.”
Ma'am boli, “YouTube mein kya karte ho? Din bhar YouTube dekhte ho?”
Main jo kaam kar raha tha, woh main unhe batana chahta tha, lekin woh samajh nahi pa rahi thi. Isliye maine kaha, “YouTube par study karta hoon. Class mein jo padhai hoti hai, jo mujhe samajh mein nahi aati, woh YouTube par dekhkar samajhta hoon.”
Ma'am ne poocha, “Kya-kya padhai kiye ho, khate mein hai na?”
Maine kaha, “Haan.”
Ma'am boli, “Hostel jao aur lekar aao. Kya padhai kiye ho, zara dekhte hain.”
Phir Ma'am ne poocha, “Nashta kiye ho ya nahi?”
Maine kaha, “Nahi kiya hoon.”
Ma'am boli, “Hostel mein kuch hai ya nahi khane ke liye?”
Maine kaha, “Nahi hai.”
Ma'am boli, “Paisa lo aur stall par biscuit kha kar aaram se aana.”
Maine kaha, “Paisa hai mere paas. Main jaldi-jaldi aa gaya, isliye nahi khaya.”
Ma'am boli, “Theek hai, hostel jao aur aaram se kha kar apni notebook lekar aana.”
Main hostel gaya, biscuit khaya aur apni notebook lekar Ma'am ke chamber mein gaya aur dikhaya. Ma'am ne dekha ki jo padhai hum class mein kar chuke the, woh sab maine note kiya hua tha. Jabki jo bachche roz class aa rahe the, unhone abhi tak note nahi kiya tha. Ma'am dekhkar khush ho gayi aur boli, “Notes to kiye ho sab! Jo bachche roz class aa rahe hain, woh bachche kuch kaam ke nahi hain. Unka notebook bhi nahi hai. Tum bina class jaaye bhi proper notes banaye ho.”
Phir Ma'am boli, “Aaj jaakar rest lena. Kal se tum class aana, roz. Jo bhi samajh mein nahi aaye, mujhe batana. Kaunse sir ya Ma'am ka samajh mein nahi aa raha hai, mujhe aakar batana. Dekhte hain kaise nahi samjhoge.” Wahin par sir aur Ma'am se mera parichay bhi karwa diya gaya. Ye sab baat bachche nahi jaante the ki Ma'am ke chamber mein mere saath kya hua tha. Ma'am itni naraz thi, phir bhi class mein meri tarif kar rahi thi. Bachche shock mein the ki ye kya hua.
Mujhe ek ladke ne poocha, “Aisa kya hua Ma'am ke chamber mein ki tu bad boy se good boy ban gaya? Hamein to Ma'am bahut daantti hain, roz ek din class na aane par. Aur tu to roz nahi aa raha tha, phir tujhe daanta bhi nahi aur kuch kaha bhi nahi.” Maine usse kaha, “Hua aise hi. Ma'am achhe mood mein thi, isliye kuch nahi boli. Na daanta, na samjhaya mujhe.”
Us din kya hua, ye koi bhi bachcha nahi jaanta hai. Maine kisi ko bhi ye saari baatein nahi batayi. Saari baat raaz hi rah gayi. Jis din Ma'am gusse mein thi aur mujhe bula rahi thi, us din agar main chala jaata to scene kuch alag hota. Lekin main dusre din khud jaakar sahi kiya aur daant khane se bach gaya.
0 Comments