Ye baat tab ki hai jab main Bhubaneswar mein MBA kar raha tha.
Hamare college mein annual function bachchon ke paise se hota tha. Hum sab milkar paisa collect karte the aur usi paise se annual function hota tha. College apni taraf se zyada kuch kharcha nahi karta tha. Us din bas canteen mein khana deta tha, uska hi kharcha college ko karna padta tha. Annual function khatam ho gaya tha aur kuch paise bach gaye the. Humne socha ki bache hue paise se chicken aur vegetarian logon ke liye paneer le aate hain. Plan bana ki raat ko hostel mein hi sab milkar cooking karenge.
Raat ke lagbhag 10–11 baje cooking start hui. Cooking ka samaan arrange karne mein hi kaafi time lag gaya tha. Idhar-udhar se samaan arrange karke laaye, phir pyaaz kaatna, tomato kaatna aur baaki preparation karne mein bhi time lag gaya. Main pehle hi bachchon se bol chuka tha ki main veg khaunga. Lekin us raat mujhe bahut neend aa rahi thi. Maine unse kaha, "Main sone ja raha hoon. Mere liye paneer rakh dena, main kal kha lunga." Itna bolkar main so gaya.
Subah jab meri neend khuli, to maine dekha ki mere liye paneer ki sabji rakhi hui thi. Sach kahun to mujhe bilkul umeed nahi thi ki woh log mere liye sabji rakhenge. Lekin jab maine dekha ki mere liye sach mein paneer rakh diya hai, to main bahut khush ho gaya. Maine socha, "Pehle naha kar aata hoon, phir aaram se khaunga." Main nahane chala gaya. Nahate waqt mere dimaag mein ek aur problem aa gayi—sabji to hai, lekin ise khaunga kis ke saath? Roti ya chawal to hai nahi.
Phir maine socha, "Koi baat nahi, dukaan se murmura le aaunga aur uske saath paneer ki sabji mix karke kha lunga." Main ye sab sochte hue naha raha tha aur mann hi mann mein paneer khane ka plan bana raha tha. Naha kar jab main room mein wapas aaya, to dekha ki paneer ki sabji gayab! Maine room mein poocha, "Yahan paneer ki sabji rakhi thi na?"
Mere roommate ne kaha, "Haan." Maine phir poocha, "Mere liye hi rakhi thi na?"
Usne kaha, "Haan, tere liye hi rakhi thi." Maine poocha, "Phir gayi kahan? Maine to khayi hi nahi."
Usne bade aaram se jawab diya, "Humne kha li." Maine kaha, "Kaise kha li? Mere liye rakhi thi!"
Woh bola, "Hume laga tu nahi khayega. Socha bekaar mein kyun jayegi, isse achha hum hi kha lete hain."
Ab mujhe samajh nahi aa raha tha ki hasun ya dukhi ho jaun. Maine kaha, "Main nahane ke liye gaya tha. Main sochkar gaya tha ki wapas aakar khaunga. Tum logon ne mujhe bina pooche kaise kha liya?" Phir maine kaha, "Tum log agar mere liye sabji rakhte hi nahi, tab bhi main dukhi nahi hota. Lekin tumne mere liye specially sabji rakhi, maine dekha to mera khane ka mann bhi ho gaya, aur uske baad tum logon ne wahi sabji kha li!" Woh phir bhi apni baat par tha. Bola, "Tu to chala gaya tha. Hume laga tu khayega hi nahi. Agar khana hota to jaane se pehle kha ke jata. Isliye humne kha liya."
Bas, ye thi us din ki meri paneer wali kahani.
Sabse funny baat ye thi ki paneer mere liye rakha gaya tha, main usse khane ka plan bana raha tha, aur jab tak main naha kar wapas aaya... paneer apni manzil par pahunch chuka tha. 😄
0 Comments