Pehle part mein story kaafi long ho gayi thi, isliye maine apni love story ko do parts mein divide kar diya. Agar aapne pehla part nahi padha hai, to pehle woh padh lena, tabhi aapko ye part achhe se samajh aayega. To chalo, hum kanha the wahi se story ko aage badhate hain…
Maine us ladki se kaha, “Kya kar diya tumne? Tum uska naam nahi batati to achha hota. Main move on kar jata. Lekin tumne usi ladke ka naam bata diya jo mere saath itna ghul-mil kar rehta hai. Ab hum dono ek-doosre ke saamne baat bhi nahi kar sakte.”
Uske baad uska message aaya. Usne kaha, “Ye tumhare liye ek task tha.” Maine poocha, “Kaunsa task?” Woh boli, “Baad mein bataungi, wait karo. Chinta mat karo, tum dono ki dosti kharab nahi hogi.” Mera mood pehle se hi bahut kharab tha. Ek taraf mujhe ye baat pata chali thi ki jis ladke se main us ladki ke baare mein poochta tha, woh khud use pasand karta tha aur usne mujhe ye baat kabhi nahi batayi. Ye baat mere liye kisi sadme se kam nahi thi. Aur ab woh ladki keh rahi thi ki ye sab ek task tha. Mujhe kuch samajh nahi aa raha tha.
Iske baad maine ye poori baat apne hostel room ke dost ko batayi. Hum dono ke beds paas-paas the, isliye hum ek-doosre ke kaafi close friends the. Maine use shuru se lekar end tak sab kuch bata diya. Ye sunkar woh bhi gussa ho gaya. Usne kaha, “Theek hai, main usse baat karta hoon. Poochta hoon ki usne aisa kyun kiya.”
Usne us ladke se baat ki aur poocha, “Tumne aisa kyun kiya? Tumne use sach kyun nahi bataya?” Tab us ladke ne jo bataya, usse poori situation aur complicated ho gayi. Usne kaha ki us ladki ne usse poocha tha ki ek senior ladke ne use propose kiya hai, to woh use kya jawab de. Us ladki ne use thoda time diya tha aur ab woh usse dobara pooch rahi thi ki kya jawab dena chahiye. Us ladke ne kaha, “Jo bhi hai, use bata do.”Ladki ne kaha, “Main to use achhe se jaanti bhi nahi hoon.” Tab us ladke ne use kaha, “Tum bolo ki mera boyfriend hai. Aur agar woh ladka naam pooche, to mera naam bata dena.”
Ladki ne poocha, “Koi problem nahi hogi na aisa bolne se?” Us ladke ne kaha, “Kuch nahi hoga, tum bas aisa bata dena.” Lekin mere dost ko ab bhi doubt tha. Usne us ladke se seedha poocha, “Tu use like karta hai?” Woh bola, “Nahi.” Mere dost ne phir poocha, “Agar tu use like nahi karta, to phir tune use apna naam batane ke liye kyun kaha? Sach-sach bata.” Tab jaakar usne kaha, “Haan, woh meri crush hai… lekin woh ladki ye nahi jaanti.”
Mere dost ne kaha, “To phir use propose kar. Dekhte hain woh kya bolti hai. Kam se kam ye clear to ho ki woh kise chahti hai.” Mere dost ke kehne par us ladke ne us ladki ko propose kar diya. Lekin ladki ne use clearly kaha, “Main tumhe sirf dost maanta hoon. Maine tumhe kabhi us nazar se nahi dekha.”
Iske baad bhi mere dimaag mein bahut saare sawaal the. Agle din raat ko maine us ladki ko call kiya. Usne phone uthaya aur kaha, “Bolo, kya jaana chahte ho?” Maine kaha, “Mujhe ye batao ki tumne aisa kyun kiya? Tumne hum dono ko ek-doosre ka dushman kyun bana diya?” Woh boli, “Woh sab bas ek task tha. Aisa kuch nahi hai.” Maine kaha, “Mujhe sab pata hai. Mere dost ne us ladke se sab kuch pooch liya hai. Jo bhi baat thi, tum mujhe directly bata sakti thi. Tumne usse kyun poocha? Woh tumhara decision tha, phir tumne usse kyun poocha?” Maine usse ye bhi kaha, “Usne jaise bataya, tumne bhi waise hi kiya. Kya tum use chahti ho? Kya woh tumhara crush hai?
Usne kaha nahi, phir tumne aisa kyun kiya? Tum actually chahti kya ho? Haan, mujhe batao.”
phir boli, “Kuch nahi. Meri wajah se tum dono dushman mat bano. Jaise pehle the, waise hi raho.” Maine kaha, “Lekin ab ye kaise possible hai? Abhi to hum dono ek-doosre se nazrein bhi nahi mila pa rahe hain.” Uske baad maine us ladki ka number delete kar diya. Na maine use koi message kiya aur na hi call.
Kuch din beet gaye. Phir ek din uska message aaya. Main notification mein message dekh leta tha, lekin jaan-bujhkar seen nahi karta tha. Thodi der baad woh message delete kar deti thi. Aisa hi roz raat ko hone laga. Woh “Hi” message karti, main notification mein dekh leta, lekin seen nahi karta. Aur kuch der baad woh message delete kar deti.
Phir ek din usne message kiya aur maine us baar message seen kar liya. Us din Vishwakarma Puja thi. Usne mujhse poocha, “Kya kar rahe ho? Puja karne nahi aaye the kya?” Maine kaha, “Nahi, main nahi gaya. Room mein hi hoon.” Woh boli, “Main tumhe us bheed mein dhoondh rahi thi, lekin tum aaye hi nahi the.” Ye sunkar mujhe thoda ajeeb laga. Maine poocha, “Tum mujhe kyun message kar rahi ho? Tumne to mana kar diya tha.” Woh boli, “Tum kyun message karte the?” Maine kaha, “Main tumse pyaar karta tha, isliye.”
Usne kaha, “Haan, main bhi isi wajah se message kar rahi hoon.” Maine poocha, “Lekin tumne to mana kar diya tha na? Tumhara crush to woh ladka hai na?” Woh boli, “Nahi. Woh sab us ladke ne kehne ke liye kaha tha. Main tumhe chahti thi, lekin situation itni bigad gayi thi ki main tumhe bata nahi paayi.”
Ab mujhe thoda-thoda samajh aa raha tha, lekin phir bhi poori clarity nahi thi. Agle do-teen din tak hum isi baare mein baat karte rahe. Woh mujhe samjhati rahi ki actually hua kya tha, lekin mere dimaag mein ab bhi bahut saare doubts the. Aakhir mein maine usse kaha, “Tum meri best friend se baat karo. Woh mujhe tumhari baat achhe se samjha degi.” Maine apni female best friend ka number usse de diya.
Uske baad meri best friend aur woh ladki dono ne ek-doosre se baat ki. Unhone poori situation ke baare mein detail mein baat ki. Phir maine apni best friend se poocha, “Tum dono ke beech kya baat hui? Mujhe sab kuch samjhao.” Usne mujhe poori baat samjhayi. Phir maine usse ek last sawaal poocha “Woh ladki sahi hai na? Main uspar bharosa kar sakta hoon na?” Meri best friend ne kaha, “Haan, mujhe to sab theek hi laga. Tum uspar bharosa kar sakte ho.”
Aur bas…Us din se meri love story officially start hui. ❤️
0 Comments