Mere channel ka pehla Santali music video “Hara Tora Juwan Mone” tha. Is video me mere dost Rohit Kumar aur ek side actress ko lead role diya tha. Iske director bhi mere dost hi the, aur producer mere pehchan ke ek bhai the. Ye video ek entry-level DSLR se shoot kiya gaya tha aur phone se edit kiya gaya tha. Aur aapko pata hai, is video ko banane me kitna kharcha hua tha? Sirf ₹1,500!
Kyunki paise sirf lead actress ko dene the. Baaki petrol ka kharcha tha, kyunki hum bike se hi shooting ke liye aana-jana karte the. Gana bhi ek purana gana tha, jo pehle se hi YouTube par available tha, lekin sirf audio ke form me. Humne us gane par apna video banaya tha. Humne shooting bhi apne aas-paas ke areas me hi ki thi. Ye video abhi YouTube par available nahi hai. Lekin aapke liye maine ise apne Instagram par post kiya tha. Wahan se save karke yahan attach kar raha hoon, aap dekh sakte ho. Quality thodi down ho gayi hai, kyunki mere paas original clip nahi hai. Isliye quality ko thoda adjust kar lena.
Ye video complete hone ke baad humne teesre din ek short film bhi shoot ki thi. Us short film me main producer bhi tha aur actor ka role bhi maine hi kiya tha. Video ka title tha “Free Fire Lover”. Ye video bhi abhi YouTube par available nahi hai. Aur dukh ki baat ye hai ki mujhe ye video kahin bhi nahi mila. Agar mil jata, to main aap sabhi ke saath zaroor share karta. Is short film me do ladkiyon ko lead role mila tha. Unmein se ek wahi ladki thi jo pehle music video me lead actress thi. Main aur mera ek dost bhi is short film me actor the. Aur is short film ki shooting ke time mujhe ghar par daant bhi padi thi.
Iske baad kai saalon baad maine ek Santali traditional song banaya, jiska studio version video maine edit kiya tha. Ye pehla Santali video tha jo maine laptop par edit kiya tha. Is video ka producer bhi main hi tha. Iske liye maine gana banane me paise lagaye the aur hamari Santali industry ke achhe singers ko bulaya tha. Aap neeche diye gaye thumbnail par click karke ye song YouTube par sun sakte hain, kyunki ye abhi YouTube par available hai.
Iske baad maine lagatar 3 aur Santali songs banaye. In tino songs me bhi producer main hi tha, lekin editor main nahi tha. In tino songs me bhi maine hamari Santali industry ke jaane-maane male aur female singers ko liya tha. Neeche diye gaye thumbnail par click karke ye song YouTube par sun sakte hain.
Iske baad kuch mahine baad maine ek aur Santali song banaya, jo ek cultural song tha. Isme bhi hamari Santali industry ke jaane-maane singers the, lekin is baar producer mere ek dost the. Unhone hi is song ka poora kharcha kiya tha. Maine unse kaha tha, “Tu paisa de de, payment aane ke baad main tera paisa lauta dunga. Chahe video par views aaye ya na aaye, tujhe tera paisa mil jayega.” Jab mera YouTube se payment aaya, maine use utna poora paisa wapas kar diya, jitna usne invest kiya tha. Revenue utna nahi bana tha, lekin maine jo promise kiya tha, use poora kiya. Neeche diye gaye thumbnail par click karke ye song YouTube par sun sakte hain.
Iske baad maine lagbhag 6 mahine tak YouTube par koi video upload nahi kiya, kyunki kisi reason se mera channel demonetize ho gaya tha. 6 mahine baad maine ek Santali music video banaya, jo kaafi high-budget tha. Isme actor aur actress dono hi famous the. Director bhi hamari Santali industry ke best directors me se ek the. Camera team, editor aur makeup artist bhi industry ke jaane-maane log the. Isliye is video me thoda zyada kharcha ho gaya.
Is video ka producer bhi main hi tha. Maine poora paisa director ko bhej diya aur unhe hi sabhi cheezein manage karne ke liye kaha. Main khud shooting par nahi gaya tha, kyunki us waqt main Bhubaneswar me tha aur shooting Mayurbhanj aur Balasore me ho rahi thi. Iske baad mere paas naya video produce karne ke liye aur paisa nahi bacha. YouTube se bhi koi revenue generate nahi hua, isliye uske baad maine koi aur official video produce nahi kiya. Yahin se filhaal meri producer ki journey par full stop lag gaya.
Aage dekhte hain, kabhi paisa hua to phir se video banana start karenge. Producer banna mera sapna hai. Mujhe is baat se koi fark nahi padta ki video revenue generate karega ya nahi. Mujhe bas video banana achha lagta hai aur ise banane me mujhe maza aata hai. Main ye income ke liye nahi, balki apne passion ke liye karta hoon.
Aap neeche diye gaye thumbnail par click karke mere dwara produce kiya hua last video dekh sakte hain. Filhaal ke liye ise mera last video hi bolenge.
0 Comments