Jab main naya naya pyaar kar raha tha, tab ki ye baat hai. Hamara pyaar public nahi tha. Hamare baare mein kisi ko nahi pata tha. Us waqt hamare college ki chhutti hui thi. Meri girlfriend apni 3-4 doston ke saath train se ghar jaati thi, aur main baad mein sabse last mein bus se jaata tha. Train hamare ghar ki taraf nahi jaati thi, isliye mujhe bus se hi jaana padta tha.
Woh aur uski saari dost college campus se nikli aur mujhe message karke bataya ki hum nikal rahe hain. Main turant apne hostel ki chhat par chala gaya aur wahan se unhe dekhne laga. Lekin wahan se woh mujhe theek se dikhai nahi de rahi thi, isliye main college gate ke paas hi aa gaya, taaki ek baar use dekh sakun.
Usne message karke poocha, “Tum kiyun aye? Hostel jao
Maine kaha, “Nahi, tum jao. Uske baad main jaunga.”
Kuch der baad bus aayi aur woh sab railway station ke liye nikal gayin. Main turant wapas hostel aa gaya. Hamare hostel mein ek junior ladke ke paas Bullet thi. Maine usse kaha, “Gadi de do, main petrol dalwa dunga. Mujhe thoda railway station jaana hai.”Usne mujhe chabi de di.
Phir maine apne room mate se kaha, “Chalo, station tak jaakar thoda ghoomkar aate hain.” Tabhi ek aur dost ne kaha, “Mujhe bhi le chalo, main bhi jaunga.” Maine kaha, “Theek hai, chalo.”
Phir hum teeno Bullet se railway station ke liye nikal pade. Jab hum station pahunche, toh meri girlfriend apni doston ke saath train ka wait kar rahi thi. Hum bhi unke paas hi khade ho gaye.
Uski ek dost ne poocha, “Bhai, aap kahan ja rahe ho?”
Mere dost ne jawab diya, “Hum bhi ghar ja rahe hain.”
Phir uski dost ne poocha, “Lekin tumhara bag kahan hai?”
Mere dost ne kaha, “Hum aise hi chale jayenge, bag ki kya zarurat hai?”
Lekin main us waqt kisi aur hi duniya mein tha. Main sirf apni girlfriend ko dekh raha tha. Usse baat toh nahi kar sakta tha, kyunki hamara pyaar secret tha. Hum dono ek doosre ke saamne khade the, lekin phir bhi aise behave kar rahe the jaise ek doosre ko jaante hi nahi.
Woh us waqt bahut hi pyaari lag rahi thi. Mera mann hi nahi maan raha tha. Bas mann kar raha tha ki use dekhta hi rahun. Shayad isi wajah se hostel ki chhat se dekhne ke baad bhi mera mann nahi bhara tha aur main use ek baar aur dekhne ke liye railway station tak chala aaya tha. Mera mann baar baar use dekhne ka karta tha. Aur sach kahun toh woh aaj bhi mujhe utni hi pyaari lagti hai. Jab bhi use dekhta hoon, aisa lagta hai jaise pehli baar dekh raha hoon.
Kabhi-kabhi mann karta hai ki bas use dekhta hi rahun. Ye secret pyaar ki feeling hi kuch aur thi. Chup-chup kar use dekhna, paas hokar bhi usse baat na kar paana, saamne hokar bhi apne emotions ko chhupana... pata nahi kyun, lekin us waqt ye sab bahut hi khoobsurat lagta tha. Agar aapne kabhi kisi se aisa secret pyaar kiya hai, toh aap shayad samajh paoge ki main kya kehna chahta hoon.
Us waqt mujhe ye ehsaas hua tha ki kabhi kabhi pyaar mein sirf kisi ko dekhte rehna bhi bahut hota hai. Aur ye ehsaas maine khud mehsoos kiya hai.
0 Comments