Ek din main YouTube par videos dekh raha tha. Tab mere mann me ek sawaal aaya ki YouTube par videos upload kaise hote hain? Maine YouTube par hi iske baare me search kiya aur ek video dekhkar upload karna seekh liya. Us samay mujhe yeh bilkul bhi pata nahi tha ki YouTube se paise bhi kamaye ja sakte hain.
Ek din YouTube scroll karte waqt mujhe Manoj Dey ka ek video mila, jiska title tha "How to Earn Money from YouTube". Maine woh video dekha aur tab pehli baar mujhe pata chala ki YouTube se earning bhi hoti hai, lekin uske liye kuch conditions poori karni padti hain. Us din ke baad maine bhi YouTube par regularly videos upload karna shuru kar diya.
Shuruaat me mujhe Copyright ke baare me kuch bhi pata nahi tha. Jo bhi video ya content milta tha, main use upload kar deta tha. Kabhi Hindi shayari ko Santali bhasha me translate karke voice ke saath upload karta tha, aur kabhi alag-alag cultural programs ke videos upload karta tha.
Ek din maine ek stage dance ka video upload kiya jisme kisi aur ka gaana tha. Kuch hi samay baad mujhe Copyright Claim mila. Tab mujhe pehli baar samajh aaya ki Copyright Claim kya hota hai.
College ke dino me hamare college ke paas ek Santali music video ki shooting ho rahi thi. Main use dekhne gaya aur uska video record karke YouTube par upload kar diya. Shuru me us video ko zyada views nahi mile. Lekin lagbhag 5–6 mahine baad wahi video achanak viral ho gaya. Us ek video ki wajah se mere channel ka Watch Time aur Subscribers dono complete ho gaye.
Us raat main itna khush tha ki sapne me dekha mera channel monetize ho gaya hai. Achanak meri neend khul gayi. Maine turant mobile uthaya aur email check kiya. Sach me, raat lagbhag 2–3 baje mere channel ka Monetization Approval aa chuka tha. Us waqt jo khushi mujhe mili thi, use shabdon me bayan karna mushkil hai.
Monetization ke baad main Santali cultural programs aur album making ke videos upload karta raha. Lekin income bahut kam thi aur payment tabhi milti thi jab 100 Dollar complete hote the. Ek din video edit karte waqt maine galti se ek video clip galat track me daal di. Jab maine preview dekha, to video aur gaana itni perfectly match kar rahe the ki mujhe ek naya idea mil gaya. Maine isi style ke aur videos banana shuru kiye, jahan gaane ke saath matching video clips edit karta tha.
Logon ko yeh format bahut pasand aaya. Mere videos viral hone lage aur comments me log meri editing ki tareef karne lage. Tab maine faisla kiya ki ab isi tarah ke videos banaunga. Kuch samay baad mere ek video me use kiye gaye gaane ke owner ne mujhe message bheja. Unhone kaha ki agar maine video delete nahi kiya to woh Strike de denge.
Maine video delete nahi kiya aur kuch hi samay baad mere channel par Copyright Strike aa gayi. Us din mujhe samajh aaya ki Copyright Strike kitni serious cheez hoti hai. Strike ke baad mujhe naye gaane use karne se darr lagne laga.
Phir maine ek naya tarika socha. Main aise purane gaane dhoondhne laga jo pehle original owner ne upload kiye the, lekin baad me unhone khud hi delete kar diye the. Un gaane ke saath maine apni editing karke naye videos upload karne shuru kiye. Dheere-dheere mere videos par lakho aur phir millions me views aane lage. Har mahine YouTube se earning hone lagi. Main apni zarurat ke liye thode paise rakhta tha aur baaki paise Fixed Deposit (FD) me invest kar deta tha.
YouTube ki earning se maine apni zindagi ki kai badi cheezen kharidi.
- ₹72,000 ka Laptop
- ₹40,000 ka Smartphone
- ₹62,000 kharch karke apna Music Video banaya
- ₹35,000 me 5 Studio Version Songs record karwaye
YouTube ki wajah se mera Producer banne ka sapna bhi poora hua. Main apni pasand ki cheezen kharid saka, apni pasand ki jagahon par ghoom saka aur apne kai sapne poore kar saka. Iske liye main dil se YouTube ka shukriya ada karta hoon.
Maine apni zindagi me kabhi paison ki kami mehsoos nahi ki. YouTube shuru karne se pehle mere Papa meri har zarurat poori karte the. Aur YouTube shuru karne ke baad meri zaruratein YouTube ne poori karni shuru kar di.
0 Comments