Fast food me Dosa mera sabse pasandida hai. Iske alawa mujhe Chat, Gupchup (Pani Puri) aur Idli bhi bahut pasand hain. Lekin mujhe Chowmein, Samosa, Momo, Bora, Puri, Patties aur Roll bilkul pasand nahi hain. Isliye main inhe khana pasand nahi karta.
Cold drinks ki baat karun to Lassi meri favourite hai, aur chocolates me Dairy Milk mujhe sabse zyada pasand hai.
Khane me mujhe Naan ke saath Paneer Butter Masala sabse zyada pasand hai. Iske alawa mujhe Chicken Biryani, Paratha, Kulcha, Pizza aur Burger bhi bahut achhe lagte hain.
Fruits me mujhe lagbhag sabhi phal pasand hain, jaise Apple, Mango, Banana, Grapes aur bahut se doosre phal. Lekin sabse zyada pasand hamare ghar ke aam ke ped ke aam hain. Woh itne meethe hote hain ki jisne ek baar kha liya, woh unka swaad kabhi nahi bhool sakta. Unka swaad shabdon me bayan karna mushkil hai. Agar yakeen nahi ho, to ek baar kha kar dekhna.
Meri maa batati hain ki jab woh aam ka ped lagaya gaya tha, tab usme gud (jaggery) dala gaya tha. Shayad isi wajah se uske aam itne meethe hote hain.
Sabziyon me mujhe Munga Alah, Kusla Alah aur Kasari Alah bahut pasand hain. Yeh Santali bhasha ke naam hain, isliye ho sakta hai aap inhe na jaante hon. Non-veg me mujhe sirf Desi Chicken Curry aur Duck Curry bahut pasand hai. Mujhe Mutton Curry bilkul pasand nahi hai, isliye main use nahi khata. Machhli ki baat karun to mujhe bahut chhoti machhli aur bahut badi machhli pasand hai, lekin medium size ki machhli ki curry mujhe pasand nahi.
Santali bhasha me ek khaas cheez hoti hai jise "How" kaha jata hai. Yeh laal rang ki chinti jaisi dikhti hai. Agar ise chawal ke saath khaya jaye, to iska swaad lajawab hota hai. Iska taste shabdon me bayan karna mushkil hai.
Smartphones ki baat karun to mujhe Oppo, Vivo aur Apple ke phones pasand hain. Lekin mujhe Samsung ke smartphones bilkul pasand nahi hain. Chahe unme kitne bhi features kyon na hon, main Samsung smartphone kharidna pasand nahi karta. Haan, Samsung ke keypad phones mujhe achhe lagte hain.
Mera pehla smartphone Oppo A37F tha. Mere bade bhai ne mujhe yeh phone lagbhag ₹10,000 me dilaya tha. Us phone ka camera bahut achha tha aur photos aur videos ki quality bhi kaafi achhi thi. Lekin zoom quality utni achhi nahi thi. Kyuki main stage programs attend karta tha aur YouTube par videos upload karta tha, isliye mujhe achhi zoom quality ki zarurat thi.
Uske baad maine Oppo A52 lagbhag ₹16,000 me kharida. Mere paas us samay sirf ₹10,000 the. Meri ek female best friend ne mujhe ₹6,000 diye kyunki use scholarship mili thi. Baad me jab mujhe YouTube se meri pehli payment mili, tab maine uske saare paise wapas kar diye. Is phone ko maine ghar walon se chhupakar kharida tha, kyunki main college mess me rehta tha aur ghar jaate waqt apna purana phone hi le jaata tha.
Jab 5G smartphones aaye, tab maine Oppo A74 5G kharida. Maine pehle wala phone OLX par bech diya, lekin ghar walon ko is baare me bhi nahi bataya. Is phone me 5G to tha, lekin zoom quality phir bhi utni achhi nahi thi. Tab mujhe samajh aaya ki sirf 5G hona hi kaafi nahi hota.
Iske baad maine Oppo Reno7 Pro 5G kharida, jiski keemat lagbhag ₹40,000 thi. Is phone ko maine apni YouTube earnings se kharida tha. Iska camera aur zoom quality mujhe bahut pasand aayi.
Jab YouTube se mujhe regular income aane lagi, tab maine socha ki ab ek iPhone lena chahiye. Maine Flipkart Big Billion Days Sale ke dauran apna iPhone 14 Plus kharida aur Oppo Reno7 Pro ko bech diya. Aaj main iPhone 14 Plus use kar raha hoon aur iski video quality mujhe bahut pasand hai.
Ab meri agli ichchha iPhone Pro Max Series kharidne ki hai. Dekhte hain, bhavishya me kab yeh sapna poora hota hai.
0 Comments