Aajkal online fraud bahut zyada ho raha hai. Aise hi ek fraud mere saath bhi karne ki koshish ki gayi thi, lekin woh log mujhe loot nahi paaye.
Ek din WhatsApp par ek message aaya - “Earn daily. Sirf YouTube videos ko like karo aur channel subscribe karo. Ek video ke ₹50 milenge.” Message dekhte hi mujhe samajh aa gaya tha ki ye fraud hai. Maine socha, aakhir kaun sirf ek video ko like aur channel subscribe karne ke ₹50 dega? Maine YouTube par is type ke fraud ke baare mein search kiya aur poori jankari le li.
Pehle ye log video ka link bhejte hain aur like aur subscribe karke screenshot bhejne ko bolte hain. Isi tarah 3 videos ke tasks dete hain. Uske baad bank account details maangte hain aur ₹150 payment kar dete hain. Matlab, ₹50 ke hisaab se 3 videos ke ₹150. Isse saamne wale ko yakeen ho jata hai ki haan, isme sach mein paisa mil raha hai. Yaani pehle trust build karte hain.
Uske baad bolte hain ki agar aap ₹10,000 deposit karoge to ₹1,000 extra milega, ₹50,000 deposit karoge to ₹5,000 extra milega. Is tarah zyada paise ka lalach dete hain. Pehle hi aapko yakeen ho chuka hota hai ki isme paisa mil raha hai, isliye aap bhi sochte ho ki paise deposit karne mein koi problem nahi hai. Lekin jaise hi aap paisa deposit karte ho, woh paisa wapas nahi milta. Woh log paise lekar chale jaate hain. Isi tarah ye fraud karte hain.
Mujhe ye sab pehle se pata tha. Phir bhi maine unka task join kar liya. Unhone mujhe video links bheje. Maine videos ko like aur channel ko subscribe karke screenshots unhe bheje. 3 videos complete karne ke baad unhone mujhe ₹150 pay kar diye. Uske baad deposit karne ka option aaya, lekin maine deposit nahi kiya. Unhe samajh aa gaya ki mera trust abhi build nahi hua hai. Isliye unhone phir videos bhejne shuru kar diye. Main videos ko like aur subscribe karke screenshots bhejta raha aur woh mujhe payment karte rahe. Aise karte-karte unhone mujhe ₹800 tak pay kar diya. Lekin tab bhi maine deposit nahi kiya.
Aakhir mein unhone message kiya - “Ab deposit karna mandatory hai. Agar deposit nahi karoge to video like aur subscribe wala task nahi milega.” Maine phir bhi deposit nahi kiya. Woh baar-baar deposit karne ke liye bolte rahe, lekin maine paise nahi diye. Mujhe bhi pata tha ki ab woh mujhe payment nahi karenge, aur unhe bhi samajh aa gaya tha ki main deposit karne wala nahi hoon. Aakhir mein maine unhe block kar diya.
Isi tarah ek baar aur mujhe message aaya. Is baar unka tarika thoda alag tha. Woh Google Maps par kisi location ka link bhejte the aur us location ko 5-star rating dene aur ek achha sa comment karne ke liye bolte the. Ek location ke ₹50 milte the. Mujhe samajh aa gaya ki ye bhi wahi fraud hai, bas naya tarika lekar aaye hain. Maine is baar bhi wahi kiya. Maine unke diye hue tasks complete kiye aur woh mujhe payment karte rahe. Lekin jaise hi deposit karne ki baari aayi, maine paise deposit nahi kiye. Is baar bhi maine unse lagbhag ₹700 tak le liye. Jab woh baar baar deposit karne ke liye bolne lage, maine unhe block kar diya.
Kuch mahine baad isi tarah ka ek aur message aaya. Ye bhi same fraud wale log the. Jab unhone meri details check ki, to unhe pata chal gaya ki main pehle bhi unke saath ye task kar chuka hoon aur main paise deposit karne wala nahi hoon. Isliye unhone mujhe task hi nahi diya aur chale gaye. Woh mujhe lootne aaye the, lekin maine unse hi paise le liye. Unke liye ₹700–₹800 de dena koi badi baat nahi hai, kyunki woh doosre logon se bahut bade amount ka fraud karte hain. Lekin mera to fayda ho gaya - maine bina koi paisa invest kiye unse paise le liye. Lekin iska matlab ye bilkul nahi hai ki aap bhi aise fraudsters ke saath task karke paise lene ki koshish karein. Aise log kabhi-kabhi pehle chhoti payment karke trust build karte hain aur baad mein bada amount deposit karwa kar fraud karte hain. Isliye bahut saavdhan rehna zaroori hai.
Aajkal online fraud bahut alag alag tarikon se ho raha hai. Jaise, koi call karke bol sakta hai ki aapka ATM/debit card block ho gaya hai. Agar aap card ko dobara chalu karna chahte hain, to card number ya OTP bataiye. Kabhi kabhi lalach dene wale links bheje jaate hain. OLX jaise platforms par koi saman kharidne jaoge to saamne wala bol sakta hai, “Aap pehle 10% payment kar do, saman aapke ghar tak deliver ho jayega. Baaki payment delivery ke time kar dena.” Is tarah bhi logon ko fraud ka shikaar banaya ja sakta hai.
Aajkal ek aur naya tarika “Digital Arrest” ke naam se bhi saamne aaya hai. Fraudsters call karke bolte hain ki aap “digital arrest” ho gaye hain ya aapke naam par case darj hua hai. Phir case hatane ya matter solve karne ke naam par paise maangte hain. Is tarah fraudsters naye naye tarike apnate rehte hain aur logon ko thagne ki koshish karte hain.
Isliye satark rahiye, kisi bhi unknown person par bina verify kiye bharosa mat kijiye aur kisi bhi tarah ke lalach mein aakar apna paisa, OTP, PIN, CVV, bank details ya personal information share mat kijiye. Online duniya mein thodi si saavdhani aapko bahut bade fraud se bacha sakti hai.
0 Comments