Q. Kya pyar mein padna galat hai?
Ans. Pyar mein padna galat nahi hai, lekin life mein sahi samay par sahi decision lena bahut zaroori hai. College ke time bahut se log apna life partner choose kar lete hain aur relationship mein aa jate hain. Isme kuch galat nahi hai, lekin uske saath apni responsibilities ko samajhna bhi zaroori hai. Agar tum college ke time relationship mein ho, to sabse pehle time manage karna seekho. Padhai ke liye bhi time do, apne partner ke liye bhi time do aur apne baaki kaam ke liye bhi time nikalo. Life mein har cheez ke liye time divide karna hoga.
Agar tumne apna jyada se jyada time partner ko de diya aur padhai ko bhool gaye, to future mein job paana mushkil ho sakta hai. Aur agar job nahi mili, to aage chal kar tumhe bahut saari problems ka saamna karna pad sakta hai. Isliye jo log already relationship mein hain, unse main sirf itna kahunga relationship ko chhodo mat, lekin apni padhai aur career ko bhi mat chhodo. Time manage karna seekho. Aaj ki mehnat hi kal tum dono ki life ko better bana sakti hai.
Aur jo log abhi apna life partner dhoond rahe hain, unse main kahunga ki abhi life partner dhoondhne ki jaldi mat karo. Pehle apni life mein kuch achieve karo, apna career banao, job pao aur apne pairon par khade ho jao. Uske baad life partner dhoondhna zyada behtar rahega. Kyunki kabhi-kabhi dono partners achhe hone ke baad bhi relationship mein bahut saari problems aa sakti hain. Maan lo tum kisi ladki se bahut pyar karte ho aur uske ghar wale uski shaadi kahin aur karna chahte hain. Ladke wale uske ghar aa rahe hain aur family us par shaadi ke liye pressure bana rahi hai. Ab tum kya karoge?
Agar tum use apne saath le aate ho, to sabse bada sawaal hoga tum dono bina paise ke kaise survive karoge? Aaj ke time mein bina paise ke life chalana bahut hi mushkil hai. Sirf pyar se ghar nahi chalta. Khane, rehne, travel, medical aur daily life ki bahut saari zarooratein hoti hain, jinke liye paise ki zaroorat padti hai. Wahin agar tumne pehle apni padhai complete kar li hoti, job kar rahe hote aur earning kar rahe hote, to shayad tum dono apni life ko zyada achhe se enjoy kar paate. Tumhare paas apna ghar sambhalne ki ability hoti aur kisi ke saamne dependent rehne ki zaroorat nahi padti. Isliye relationship mein hona galat nahi hai, lekin relationship ke chakkar mein apne future ko barbaad karna galat hai.
Jo pyar mein pad chuke ho, time manage karna seekho. Padhai karo, career banao, job ke liye mehnat karo, apne partner ko time do aur apni baaki responsibilities bhi poori karo. Aur jo abhi life partner dhoond rahe ho, thoda wait karo. Pehle khud ko itna capable banao ki kal agar tumhe apne partner ke liye koi bada decision lena pade, to tumhare paas us decision ko sambhalne ki capacity ho.
0 Comments