Main Rairangpur College mein +2 ki padhai kar raha tha. Ye baat tab ki hai jab Covid aa gaya tha. Covid ki wajah se school aur college sab band ho gaye the aur main ghar aa gaya tha. Main jahan coaching ja raha tha, wahan ke sir ne bhi online padhana shuru kar diya. Sir ne ek WhatsApp group banaya aur coaching ke sabhi bachchon ko us group mein add kar diya. Sir us group mein video record karke upload kar dete the aur hum ghar par baithkar woh video dekhkar padhai karte the. Isi tarah hamari coaching ki padhai chal rahi thi.
Coaching mein jo bachche the, unmein se main bahut se bachchon ko pehchanta nahi tha. Ek din maine group mein sabhi ko message karke unka naam aur college ka naam pucha. Isi tarah dheere-dheere maine kuch bachchon ko pehchana. Usi waqt maine do ladkiyon ko bhi message kiya tha. Mujhe pata nahi tha ki woh ladkiyan hain, kyunki unki DP nahi lagi hui thi. Jab unhone reply kiya, tab baat hui. Maine unka naam aur college ka naam pucha. Saath mein ye bhi pucha, “Main aapko message kar raha hoon, koi problem to nahi hai na?”
Maine ye isliye pucha kyunki hum sab ghar par the aur woh ladkiyan thi, isliye mujhe laga ki pehle puch lena hi achha rahega. Woh dono mere college ki nahi thi. Hum ek hi coaching centre mein padhte the, lekin phir bhi hum kabhi mile nahi the, kyunki woh subah coaching jaati thi aur main shaam ko. Hamare do alag groups the ek subah ka group aur ek shaam ka group.
Maine un dono se kaha, “Dost banoge kya?” Dono ne haan kaha.
Main un dono ko ek saath message karta tha aur kabhi-kabhi hum chat par baat karte the. Un dono ke alawa meri koi female friend nahi thi. Unmein se ek ladki mujhse lagbhag roz shaam ko baat karti thi, jabki doosri ladki kabhi-kabhi hi baat karti thi. Aise hi baat karte-karte jo ladki mujhse roz baat karti thi, woh mujhe meri best friend jaisi lagne lagi. Ek din maine usse kaha, “Tum meri best friend banogi kya?”
Usne haan kaha aur us din se hum best friends ban gaye. Uski dost meri dost ban gayi aur meri dost bhi uski dost ban gayi. Woh dono ek-doosre ko pehle se jaanti thi. Dono dost thi aur ek hi hostel mein roommates bhi thi. Lekin meri best friend ne mujhse ek baat kahi thi. Usne kaha, “Main tumhari best friend to hoon, lekin main tumse kabhi saamne se nahi milungi. Sirf phone par hi baat karungi. Isliye mujhse milne ki ummid mat rakhna.”
Maine kabhi ye socha hi nahi tha ki hum saamne milenge ya nahi. Isliye uski ye baat sunkar mujhe samajh nahi aaya ki usne aisa kyun kaha. Maine usse pucha bhi tha ki “Kyun nahi milogi?”
Usne iska reason bhi bataya tha, lekin ab mujhe yaad nahi hai. Is baat ko hue lagbhag 7 saal ho gaye hain aur main ab ye sab likh raha hoon. Us waqt mujhe apni life ki in chhoti-chhoti baaton ko likhne ka shauk nahi tha. Usne jo kaha, maine maan liya aur kaha, “Theek hai.”
Lekin us waqt mujhe thoda dukh hua tha. Agar woh mujhse kabhi nahi bhi milti, to shayad mujhe itna dukh nahi hota, kyunki maine kabhi uske saath saamne milne ke baare mein socha hi nahi tha. Lekin usne jab khud kaha ki woh kabhi saamne nahi milegi, to mujhe thoda ajeeb aur bura laga. Lekin baad mein hum saamne mile bhi.
Covid khatam hone ke baad jab college khula, tab meri best friend mujhse saamne mili. Jab usne mujhe dekha, to usne mujhe ek watch gift ki. Maine pehle kabhi socha bhi nahi tha ki woh mujhe gift degi. Jab usne mujhe watch gift ki, to mujhe laga ki agar main use kuch gift nahi dunga to achha nahi lagega. Isliye maine bhi use ek diary gift ki.
Us samay main mess mein rehta tha. Hamare mess mein subah aur raat ko hi khana milta tha, lunch nahi milta tha. Lekin lunch to zaruri tha. Raat ka khana kabhi-kabhi na bhi khaun to chal sakta tha, lekin lunch skip karna mushkil hota tha. Meri best friend meri ye problem samajhti thi. Woh raat ke bache hue rice ko subah pokhal bana deti thi aur subah gas par kuch sabji banakar mujhe tiffin mein de deti thi. Main woh tiffin lekar hostel aata tha aur lunch mein khata tha.
Hostel ke bachche mujhe chidhate hue kehte the, “Arey, ye teri girlfriend hai kya?”
Main unhe batata tha, “Nahi, ye meri best friend hai.”
Lekin woh meri baat nahi maante the. Baad mein mujhe pata chala ki woh log bhi jaante the ki woh meri best friend hi hai, bas mujhe chidhane ke liye girlfriend bolte the. Us samay main YouTube par videos bhi banata tha. Main Santali music videos ke updates deta tha video kis channel par release hua hai, actors aur actresses kaun hain, video mein kis-kis ne kaam kiya hai, aur bhi bahut si information deta tha. Lekin main videos ko thoda alag tarike se banata tha. Video ki starting mein ek chhoti si story hoti thi aur uske baad main actual update batata tha.
Ek din maine apni female friend se kaha, “Chalo, ek video banate hain.” Meri best friend camera ke saamne nahi aana chahti thi, isliye maine uski room mate ko bola, jo meri bhi dost thi. Jaise maine pehle bataya, woh meri best friend ki dost bhi thi aur meri bhi dost thi. Hum chaar log video shoot karne gaye main, meri female friend, meri best friend aur mera ek male friend. Camera mere male friend ka tha, isliye hum usi camera se shoot kar rahe the. Video ka part zyada bada nahi tha, lagbhag ek minute ka tha. Humne video shoot kiya aur phir hostel wapas aa gaye. Wahan humne kuch photoshoot bhi kiya.
Agle din main apne dost ke mess mein gaya, jahan mera dost rehta tha. Wahan maine dekha ki ek ladka mujhe gusse se ghure ja raha hai. Main use dekhkar hairan ho gaya. Maine socha, “Ye mujhe aise kyun dekh raha hai? Is ladke se to meri koi dushmani bhi nahi hai. Phir ye mujhe itne gusse se kyun dekh raha hai?” Baad mein mujhe pata chala ki woh ladka usi ladki ko pasand karta tha jo meri friend thi. Lekin woh ladki us ladke ko pasand nahi karti thi, woh sirf use apna dost maanti thi. Aur us ladki ne mere saath video banaya tha, isliye woh ladka mujhe gusse se dekh raha tha. Woh mujhe kuch keh bhi nahi pa raha tha, bas gusse se ghure ja raha tha. Aaj bhi us din ki baat yaad aati hai to mujhe us ladke par thoda taras bhi aata hai aur hasi bhi.
Ek din hum tino main, meri friend aur meri best friend cycle se Modak Restaurant gaye. Wahan humne naan khaya. Naan mera favourite hai aur uske saath Paneer Butter Masala mujhe aur bhi pasand hai. Main Modak Restaurant aksar kuch na kuch khane ke liye jata tha. Wahan ka khana mujhe bahut achha lagta tha. Lekin ab wahan pehle jaisa khana nahi milta. Ek baar main specially naan khane ke liye gaya tha, lekin pehle jaisa taste nahi tha. Jo log pehle wahan khana banate the, woh ab wahan nahi hain. Shayad isi wajah se ab wahan ke khane ka taste pehle jaisa nahi raha.
Fir jab mera birthday aaya, meri best friend ne mujhe ek T-shirt gift ki. Mujhe bahut achha laga. Woh us waqt apne ghar par thi aur main mess mein. Usne ghar se bus ke through mere liye T-shirt bhej di. Main bus stand gaya aur wahan se uska bheja hua gift receive karke le aaya.
Aaj itne saal baad jab main un sabhi baaton ko yaad karta hoon, to lagta hai ki Covid ke us samay mein, jab sab kuch band tha aur hum ghar mein reh rahe the, tab WhatsApp par shuru hui ek normal si dosti kab meri best friendship ban gayi, pata hi nahi chala.
Aur sabse interesting baat ye hai ki jis ladki ne shuru mein kaha tha ki “Main tumse kabhi saamne nahi milungi,” wahi baad mein mujhse saamne mili, gift diya, aur meri life ki un yaadgar dosti ka ek important hissa ban gayi.
0 Comments