Best Friend Ke Saath Pehli Aur Yaadgar Bus Journey

Ye baat tab ki hai jab main Bhubaneswar mein MBA ki padhai kar raha tha.

Mera aur meri best friend ka ghar ek hi side mein padta hai. Hamare ghar ki taraf jaane wali bus Bhubaneswar se ek hi route se jaati hai. Lekin hum dono kabhi ek saath travel nahi karte the. Main night bus mein sirf sleeper mein travel karta hoon. Seat par main zyada der tak baithkar travel nahi kar sakta, kyunki Bhubaneswar se ghar pahunchne mein lagbhag 6–7 ghante lag jaate hain. Itni der tak seat par baithna mere liye possible nahi hota.

Lekin meri best friend sirf seat par baithkar hi travel karti thi. Isliye hum dono ke liye ek hi bus mein saath travel karna possible nahi hota tha. College ki chhutti ka time bhi alag-alag hota tha, isliye kabhi mauka hi nahi mila. Lekin ek baar aisa hua ki hum dono ki college se ek hi time par chhutti hui. Maine apni regular bus mein booking karne ke liye call kiya. Lekin us bus mein sleeper available nahi tha, sirf seat available thi.

Maine apni best friend se kaha, “Tum jis bus se jaati ho, uska number do. Meri bus mein sleeper nahi mil raha hai.” Usne mujhe apni bus ka number de diya. Maine us bus mein booking check ki aur usmein sleeper available tha. Maine turant apna sleeper book kar liya. Woh bus Bhubaneswar se shaam ko lagbhag 5 baje hi nikal jaati thi, isliye usmein zyada passengers nahi the.

Jab hum bus mein chadhe, to meri best friend jis seat par baithi thi, uske bagal wali seat khali thi. Maine socha, “Abhi to ye seat khali hai, main yahin baith jaata hoon. Jab is seat ka passenger aa jayega, tab main apne sleeper mein chala jaunga.” Main uske bagal mein baith gaya. Maine bus stand par online pizza order kiya tha. Pizza bus mein aaya aur hum dono ne saath mein pizza khaya. Humne kaafi baatein ki aur selfie bhi li. Uske baad main apne booked sleeper mein chala gaya aur so gaya.

Baad mein pata chala ki meri best friend ke bagal wali seat ka passenger aaya hi nahi. Shayad woh seat ladies seat thi aur meri best friend ke bagal mein male passenger ko seat dene ki wajah se woh seat khali reh gayi thi. Agar main chahta to poori journey uske bagal mein baith sakta tha, lekin main seat par zyada der tak baithkar travel nahi kar sakta tha. Isliye main apne sleeper mein chala gaya. Ye pehli aur shayad ek hi baar tha jab main aur meri best friend ek saath bus mein travel kiye the.