Ek din main apne Maa aur Papa ke saath shopping mall gaya tha. Mujhe apne liye ek naya dress kharidna tha. Sach kahun to mujhe kapde chunna bilkul nahi aata. Isliye jab bhi main shopping karne jaata hoon, main hamesha Maa aur Papa ki pasand par bharosa karta hoon.Woh mere liye 2–3 ya kabhi 3–4 dresses pasand karte hain, aur phir unme se main ek chun leta hoon.
Us din bhi kuch aisa hi hua. Papa ne mere liye 3–4 dresses nikale aur poocha, "Inme se kaunsa pasand hai?" Maine unme se ek dress pasand kar li. Lekin Maa ko woh dress pasand nahi aaya.
Maa ne kaha, "Agar tumhe pasand hai to wahi le lo." Maine turant kaha, "Nahi, agar aapko pasand nahi hai to hum koi aur dress dekh lete hain." Lekin Maa baar-baar kehti rahi, "Tumhe pasand hai na? To wahi le lo. Kapde tumhe pehenne hain, hume nahi."
Aakhir me maine wahi dress le liya. Lekin pata nahi kyun, us din mere dil me ek ajeeb si udaasi thi. Mere liye Maa aur Papa dono ki khushi barabar maayne rakhti hai. Main hamesha chahta hoon ki jo bhi cheez main chunun, woh Maa ko bhi pasand aaye aur Papa ko bhi. Main kabhi nahi chahta ki meri wajah se un dono me se kisi ko bhi bura lage.
Shayad kisi aur ke liye yeh sirf ek dress chunne ki baat ho. Lekin mere liye yeh ek chhoti baat nahi thi. Meri khushi tabhi poori hoti hai jab Maa aur Papa dono khush hote hain. Unki muskaan hi meri sabse badi khushi hai, aur unki pasand ki izzat karna mere liye hamesha sabse zaroori rahega.
.png)
0 Comments