“Koshish karne se kuch bhi impossible nahi hai.”
Ye sirf ek kahawat nahi hai, balki ek sachchai hai, jo meri life mein prove ho chuki hai. Meri real-life story sunne ke baad aapko motivation milega aur is kahawat ka ek real-life example bhi dekhne ko milega.
Mujhe laptop par video editing seekhni thi. Maine YouTube par search kiya ki easy video editing software kaunsa hai. Wahan mujhe Filmora ke baare mein pata chala. Maine uske tutorials dekhne shuru kiye aur dheere-dheere Filmora seekh gaya. Uske baad maine socha ki aur kaun kaun se software hain, jinse thodi advanced editing ki ja sakti hai. Tab mere saamne Adobe Premiere Pro aaya. Adobe Premiere Pro seekhne ke liye maine uske tutorial videos dekhna shuru kiya. Lekin jab maine pehli baar uska interface dekha, to main dar gaya. Mere dimaag mein turant ye baat baith gayi ki, “Ye software mujhse nahi hone wala.” Main tutorial video dekhta raha, lekin mujhe kuch samajh nahi aa raha tha. Itna saara setup aur itne saare options dekhkar mujhe bahut hard laga. Maine soch liya ki, “Ye mujhse nahi hoga.” Isliye maine Premiere Pro seekhna chhod diya aur socha ki Filmora se hi kaam chala lenge.
Kuch din baad maine dekha ki mere contact mein jo ek editor tha, woh Premiere Pro par editing karta tha. Woh aksar apne projects ke screenshots status par lagata tha. Main roz uske status dekhta tha. Tab mujhe pata chala ki achha, bahut saare editors isi software par editing kar rahe hain. Maine YouTube par bhi research kiya aur dekha ki professional video editing ke liye Premiere Pro ka bahut zyada use hota hai. Tab maine faisla kar liya ki ab mujhe ye software seekhna hi hai, chahe jaise bhi ho. Maine khud se kaha, “Agar doosre log is software ko seekh kar use kar sakte hain, to main kyun nahi kar sakta?” Maine dobara Premiere Pro ke tutorial videos dekhna shuru kiya. Aur is baar mujhe wahi software easy lagne laga. Dheere dheere main seekhta gaya aur ek din maine khud kaha:
“Arey, ye to sabse easy software hai! Isse easy to koi software hi nahi hoga.”
Ab sochiye, pehle mujhe Premiere Pro bahut hard laga tha aur baad mein wahi software mujhe sabse easy lagne laga. Lekin aisa kyun hua?
Tutorial video wahi tha, samjhane wala bhi wahi tha aur topic bhi wahi tha. Phir pehli baar hard aur doosri baar easy kyun laga?
Aisa meri soch ki wajah se hua.
Pehli baar mera dimaag pehle hi decide kar chuka tha ki, “Mere se ye nahi hone wala.” Isliye jab main tutorial dekh raha tha, tab mera mind already negative decision le chuka tha. Samjhane wala chahe kitna bhi achhe se samjhaye, mujhe woh hard hi lagna tha. Lekin doosri baar meri thinking completely different thi. Maine decide kar liya tha ki mujhe ye software seekhna hi hai, chahe jaise bhi karke. Maine dekha ki doosre log ise seekh gaye hain, to main kyun nahi seekh sakta? Woh bhi to mere jaise hi log hain. Isi thinking ki wajah se maine tutorial par properly focus kiya aur dheere-dheere mujhe sab kuch samajh mein aane laga. Isliye kabhi bhi kisi cheez ko dekhkar dar mat jaana aur ye mat sochna ki “Mere se nahi hoga” ya “Ye mere bas ki baat nahi hai.” Ho sakta hai ki problem us cheez mein nahi, balki aapki thinking mein ho.
Jab tak aapke dimaag mein ye rahega ki “Mere se nahi hoga”, tab tak woh cheez aapko hard hi lagegi. Lekin jis din aap apni thinking badal doge aur ye decide kar loge ki, “Mujhe ye seekhna hai, chahe jitni bhi mushkil aaye,” us din aapko wahi cheez dheere-dheere easy lagne lagegi. Aapko khud ko motivate karna padega. Kisi bhi cheez ko seekhne ki koshish karte waqt agar aapke mind mein pehle se hi ye hai ki, “Mere se to ye hone wala hi nahi hai, chahe main kitni bhi koshish kar loon,” to aapke liye woh cheez aur bhi difficult ho jayegi. Lekin jis din aapne ye soch badal di aur khud se kaha, “Mujhe karna hai aur main karke rahunga,” us din aap dekhenge ki aap kitni mushkil cheez ko bhi seekh sakte hain.
Meri real-life story se aapko clear ho gaya hoga ki success ke liye hamari thinking kitni matter karti hai. Negative thinking ke saath koshish mat karo. Positive thinking ke saath koshish karo. Aapko khud par bharosa rakhna hoga. Mere liye bhi ek time par Premiere Pro seekhna impossible jaisa tha. Lekin baad mein wahi mere liye possible ho gaya.
Isliye yaad rakho - “Impossible aksar cheez nahi hoti, hamari soch hoti hai.”
Koshish karte raho, seekhte raho aur khud par bharosa rakho. Ho sakta hai aaj jo cheez aapko impossible lag rahi hai, wahi kal aapke liye sabse easy cheez ban jaaye.
0 Comments