Fresher Party Aur Hamara Chhupa Hua Pyaar

Ye baat tab ki hai jab humne college mein naye-naye join kiye students ke liye fresher party organize ki thi. Us waqt hamara naya-naya pyaar shuru hua tha.

College mein jo bhi event hota hai, main sabhi ka video shoot karta hoon aur YouTube par upload karta hoon. Us din bhi main event ki video recording kar raha tha. Main ek dance performance ki video record kar raha tha. Recording karne ke baad main thoda piche chala gaya, taaki main use piche se dekh sakun. Samne se to use khulkar dekh nahi sakta tha, isliye piche se hi dekh kar khush ho raha tha.

Woh bhi mujhe dhoondhti rahti thi. Shayad uske mann mein ye chal raha tha ki, "Abhi to yahin par video shoot kar raha tha, pata nahi kahan chala gaya." Phir woh baithkar piche mudti hai aur mujhe dekh leti hai.

Us din kuch alag hi baat thi. Chup-chup kar ek-doosre ko dekhne mein bada hi maza aa raha tha. Hamare relationship ke baare mein college mein kisi ko pata nahi tha, isliye ye chhoti-chhoti baatein aur bhi special lag rahi thi. Us din woh bahut hi sundar lag rahi thi. Usne white colour ka kurta pehna hua tha - shayad kurta hi kehte hain, mujhe ladkiyon ke dresses ke baare mein zyada knowledge nahi hai. Uske haath mein black colour ki smartwatch thi, pairon mein white sandals the aur baal open the. Pata nahi kyun, lekin us din woh mujhe bahut hi beautiful lag rahi thi. Mera mann baar baar use dekhne ka karta tha, lekin samne se nazrein nahi mila sakte the. Isliye main piche chala jata tha aur piche se hi use dekhkar khush ho jata tha. 

Usi din mere classmate ki ek ladki friend ne mujhse pucha,

"Kaun hai woh ladki, jisse tu pyaar karta hai?"

Woh hamare relationship ke baare mein jaanti thi, lekin meri girlfriend kaun hai, ye use pata nahi tha.

Maine usse kaha,

"Tere saath hi to woh ladki ghoom rahi hai aur tu use pehchan nahi pa rahi hai."

Woh sochne lagi, "Kaun hai woh ladki jo mere saath hi ghoom rahi hai, lekin mujhe pata hi nahi?"

Woh boli,

"Main to do-teen ladkiyon ke saath ghoom rahi hoon, lekin unmein se kaun hai?"

Usne ek ek karke ladkiyon ke naam bataye, lekin jis ladki se main pyaar karta tha, uska naam usne nahi liya.

Ab woh aur bhi sochne lagi ki aakhir woh ladki kaun hai.

Woh boli,

"Main dhoondh lungi use." Sabko poochungi?

Maine kaha,

"Nahi, maine tumhe hint de diya hai. Ab tum khud dekho."

Darasal, meri girlfriend uske saath hi ghoom rahi thi. Woh event ke liye samaan lane-le jaane aur bachchon ke liye cold drinks aur baaki khane-peene ki cheezein arrange karne mein help kar rahi thi. Lekin uske saath aur bhi ladkiyan help kar rahi thi, isliye woh meri girlfriend ko pehchan nahi paayi.

Kuch der baad main samne chala gaya aur samne baithkar video recording karne laga. Mere paas meri girlfriend ka bhai bhi baitha hua tha. Uske bhai ko bhi hamare relationship ke baare mein kuch nahi pata tha. Maine use DSLR camera de diya aur kaha ki tum photos click karo, jabki main apne iPhone se video recording karne laga.

Uske bhai ne apni behen se kaha,

"Idhar dekho, photo click karunga."

Maine usse kaha,

"Camera lekar udhar jao aur photo khicho."

Phir woh camera lekar udhar chala gaya aur photos click karne laga.

Ye tha hamare Fresher Welcome Day ka ek chhota sa hissa - ek aisa din, jab hamara pyaar naya naya tha aur ek doosre ko chup chup kar dekhne mein bhi ek alag hi khushi milti thi.