Shuruaat me meri bhi haalat baaki students ki tarah hi thi. Main class me 100% dhyan deta tha aur har baat samajhne ki poori koshish karta tha, lekin phir bhi Mathematics mujhe bilkul samajh nahi aati thi. Isi wajah se main Mathematics me aksar fail ho jaata tha.
Us samay meri koi behen nahi thi, isliye main ek ladki ko apni behen maanta tha. Uska ek bada bhai tha jo college me padhai karta tha, aur us samay hum 8th class me the. Ek din meri us behen ne mujhe ek Mathematics ka question diya aur kaha ki ise mere bhai ke paas le jao. Main woh question lekar unke paas gaya. Unhone pehle question dekha, phir mujhse poocha, "Kya tumhe Mathematics me koi problem hoti hai?"
Maine sach-sach bata diya ki mujhe Mathematics me kuch bhi samajh nahi aata. Unhone muskura kar kaha, "Koi baat nahi, tum roz mere paas aao. Main tumhe sab kuch shuruaat se samjhaunga." Mujhe thoda darr lag raha tha ki kahin woh mujhe daant na dein, kyunki mujhe kuch bhi nahi aata tha. Lekin agle din main apni Mathematics ki kitab lekar unke paas chala gaya.
Unhone mujhe bilkul ek chhote bachche ki tarah pyaar se padhaya. Sabse pehle unhone mere fundamentals clear kiye. Unhe samajh aa gaya tha ki meri problem questions me nahi, balki basics me thi. Isliye unhone bilkul shuruaat se har concept ko step by step samjhana shuru kiya.
Dheere-dheere meri Mathematics samajh me aane lagi. Ab jab bhi mujhe koi doubt hota, main roz unke paas chala jaata aur woh bina gussa kiye, bina daante, bahut pyaar se meri har problem solve kar dete. Isi wajah se mera darr bhi khatam ho gaya.
Kuch dino baad hamara class test hua. Pehli baar main Mathematics me pass hua aur mujhe 100 me se 50 number mile. Mere liye yeh kisi jeet se kam nahi tha. Usi din se Mathematics mera pasandida subject banne laga. Uske baad mujhe bade se bada question solve karne me bhi maza aane laga. Jab koi mushkil question solve nahi hota tha, to main baar-baar koshish karta tha. Agar phir bhi nahi hota, to use raat ke liye chhod deta.
Sone se pehle bhi main usi question ke baare me sochta rehta tha. Kai baar to sapne me hi uska solution mil jaata tha. Subah uthte hi main us question ko solve karta aur jab answer sahi aata tha, to jo khushi milti thi, use shabdon me bayan nahi kiya ja sakta.
Jab main 10th class me tha, tab hamare do exams hue the — Test Exam aur Final Exam. Test Exam dene ke baad maine khud hi apne Mathematics ke marks calculate kiye. Hamare Mathematics teacher ne mujhse poocha, "Tumhare hisaab se kitne marks aayenge?" Maine hisaab lagakar kaha, "80 me se nahi, 100 me se 80." Jab result aaya, to maine dekha ki mere Mathematics me bilkul 80 marks aaye the. Main bahut khush hua aur mere teacher bhi meri progress dekhkar khush hue.
Baad me jab main +2 me tha, tab maine coaching join ki. Wahan ek test exam hua jisme mujhe 20 me se 20 marks mile. Agar us bhai ne us din meri madad na ki hoti, to shayad main kabhi Mathematics ko samajh hi nahi paata aur na hi usme achhe marks la paata. Main aaj bhi unka dil se shukriya ada karta hoon. Bhale hi woh school ke teacher nahi the, lekin mere liye woh meri zindagi ke sabse achhe teachers me se ek hain.
Meri nazar me asli teacher woh nahi hota jo sirf hoshiyaar students ko padhaye. Asli teacher woh hota hai jo kamzor student ko samjhe, uske basics ko mazboot kare aur use achhe marks lane layak bana de. Wahi ek mahaan teacher ki pehchan hai.
High School me mujhe Trigonometry solve karna sabse zyada pasand tha. Aur jab main +2 me pahucha, tab Derivatives aur Integration ke questions solve karne me mujhe alag hi khushi milti thi. Isi tarah Mathematics dheere-dheere mera sabse pasandida subject ban gaya.
Mere story se aap samajh chuke honge ki koi bhi cheez hard nahi hai, bas aapko basic pata nahi hai, isiliye aapko hard lag raha hai. Jab bhi koi bhi cheez hard lage, to aap samajh jaana ki mera fundamental clear nahi hai aur shuru se start karna. Basic se dekhenge to easy lagega.
Jaise ki aap Vivo phone use karte hain aur aapke paas ek buzurg aadmi aaye aur unhone aapko Samsung phone diya aur kaha ki Rajiv naam se save number hai, use call lagao, main nahi kar pa raha hoon. Aapne contact list se Rajiv ko search kiya aur number dial kar diya. Aapka to Vivo ka phone hai, to Samsung ka phone kaise chala paaye? Kyunki aapko basic pata hai ki contact mein number save rehta hai aur kaise call lagate hain.
Aur ek example dunga aapko. Aapko bike chalana aata hai aur ghar mein Hero Splendor Plus bike chalate hain. Agar aapko doosri bike chalane ke liye bola jaye, jaise Bullet, to aap chala payenge ki nahi? Chala payenge, kyunki aapko basic pata hai—brake ka kya kaam hai, accelerator ka kya kaam hai aur clutch ka kya kaam hai. Ye sab aap jaante hain, isiliye aapko jo bhi bike di jaaye, aap chala payenge. Jinko basic pata nahi hai, woh nahi chala payenge. Is example se aapko clear ho gaya hoga.
0 Comments